AQSH harbiy-havo kuchlarining qiruvchi samolyotlari Alyaskaga yaqinlashayotgan Rossiya prezidenti Vladimir Putinning bortini himoya qiladi. Bu haqda Newsweek nashriga Kanada harbiy-havo kuchlarining iste’fodagi general-mayori Skott Klensi ma’lum qildi.
“Shimoliy Amerikani harbiy bosqinlardan himoya qilish uchun ishlatiladigan vositalar, Rossiya bu yil uch marta shunday bosqin qilgan, bo‘lajak sammitda Rossiya prezidentini himoya qilish uchun qo‘llaniladi”, deya ta’kidladi u.
Klensi, bu “taqdirning qiziq hazili” ekanligini qo‘shimcha qilgan.
Sobiq zobitning aytishicha, Alyaskada AQShning ikkita yirik aviabazasi - Putin kelishi kutilayotgan Elmendorf-Richardson va Ferbenks mavjud. Ularda boshqa samolyotlar qatorida beshinchi avlod F-22 va F-35 qiruvchi samolyotlari ham bor.
Nashrning ta`kidlashicha, Rossiyaning Su-57 va Amerikaning F-22 Raptor qiruvchi samolyotlari Rossiya va AQSH prezidentlari sammiti munosabati bilan birinchi marta bir havo hududida uchrashishi mumkin.
Aniqlashtirilishicha, agar Su-57 samolyotlari Alyaskaga yo‘l olgan Rossiya rahbarining samolyotiga hamrohlik qilsa, bunday uchrashuv sodir bo‘lishi mumkin. Qayd etilishicha, bir nechta F-22 samolyotlari Putin va AQSH prezidenti Donald Tramp uchrashuvi rejalashtirilgan Elmendorf-Richardson harbiy bazasida joylashgan.
15-avgust kuni Putin va Tramp Alyaskada muzokara o‘tkazadi. Asosiy mavzu - Ukrainadagi tinchlik. Uchrashuv Toshkent vaqti bilan soat 00:00 da boshlanib, yakkama-yakka suhbat bilan davom etadi. Muhokama qilinishi mumkin bo‘lgan takliflar orasida hududlarni almashish va Kiyevning NATOga a’zo bo‘lishdan voz kechishi bor. Uchrashuvda Rossiya va AQSH o‘rtasidagi iqtisodiy hamkorlik masalalari ham ko‘rib chiqiladi.
Izoh (0)