Fransiya prezidenti Emmanuel Makron Rossiya Federatsiyasi prezidenti Vladimir Putinning Ukrainadagi urushni tugatishga tayyorligiga shubha bilan qarashini ma’lum qildi. Bu haqda Makron Oq uyda o‘tkazilgan muzokaralardan so‘ng NBC News’ga bergan intervyusida aytib o‘tgan.

“Vaziyat va faktlarga qarab, prezident Putin hozirda tinchlikka alohida tayyorgarlik ko‘rayotganini ko‘rmayapman”, dedi u.
Uning so‘zlariga ko‘ra, AQSH yechim topish uchun Rossiyaga bosim o‘tkazishi, jumladan qo‘shimcha sanksiyalar kiritishi kerak.
“Agar AQSH prezidenti Donald Tramp e’lon qilgan Rossiya prezidenti Vladimir Putin va Ukraina prezidenti Vladimir Zelenskiy o‘rtasidagi ikki tomonlama uchrashuvda oldinga siljish bo‘lmasa va uch tomonlama uchrashuv muvaffaqiyatsizlikka uchrasa, ikkilamchi va birlamchi sanksiyalarni kuchaytirishimizga to‘g‘ri keladi”, deya ta’kidladi Makron.
Fransiya prezidenti Tramp, Zelenskiy va Yevropaning yetakchi rahbarlari bilan uchrashuvdan so‘ng, Ukrainaga kelajakda Rossiya tomonidan mojaroni cho‘zishi yoki yangi urushni keltirib chiqarishi mumkin bo‘lgan har qanday hujumlarning oldini olish uchun xavfsizlik kafolatlarini berish zarurligini aytgan.
“Agar siz xavfsizlik kafolatlari bo‘lmagan holda har qanday tinchlik bitimini imzolasangiz, Rossiya hech qachon o‘z so‘zida turmaydi va majburiyatlarini bajarmaydi”, deb hisoblaydi Makron.
Uning aytishicha, Trampning 15-avgust kuni Alyaskada Putin bilan uchrashuvining asosiy jihatlaridan biri Ukraina uchun xavfsizlik kafolatlarini qabul qilgani umid bag‘ishlaydi.
O‘t ochishni to‘xtatish ehtimoli haqidagi savolga Makron “juda umid qilaman” deb javob berdi, biroq Rossiya jahon yetakchilari delegatsiyasi AQSHda bo‘lgan paytda ham Ukrainaga zarbalar berganini ta’kidlagan.
18-avgust kuni kechqurun Tramp Zelenskiy va Yevropa yetakchilari bilan muzokaralar o‘tkazdi. Ochiq qism yarim soatdan sal kamroq davom etdi. Muzokaralarda NATO bosh kotibi Mark Ryutte, Yevrokomissiya rahbari Ursula fon der Lyayen, Buyuk Britaniya bosh vaziri Kir Starmer, Fransiya prezidenti Emmanuel Makron, Germaniya kansleri Fridrix Merts, Finlyandiya prezidenti Aleksandr Stubb, Italiya bosh vaziri Jorj Meloni ishtirok etdi.
Trampning o‘zi uchrashuvni “juda samarali” deb atadi. Uning so‘zlariga ko‘ra, tomonlar AQSH bilan kelishilgan holda Yevropaning turli davlatlari tomonidan taqdim etiladigan Ukraina uchun xavfsizlik kafolatlarini muhokama qilgan.
Izoh (0)