Франция президенти Эммануэл Макрон Россия Федерацияси президенти Владимир Путиннинг Украинадаги урушни тугатишга тайёрлигига шубҳа билан қарашини маълум қилди. Бу ҳақда Макрон Оқ уйда ўтказилган музокаралардан сўнг NBC Newsъга берган интервьюсида айтиб ўтган.
“Вазият ва фактларга қараб, президент Путин ҳозирда тинчликка алоҳида тайёргарлик кўраётганини кўрмаяпман”, деди у.
Унинг сўзларига кўра, АҚШ ечим топиш учун Россияга босим ўтказиши, жумладан қўшимча санкциялар киритиши керак.
“Агар АҚШ президенти Дональд Трамп эълон қилган Россия президенти Владимир Путин ва Украина президенти Владимир Зеленский ўртасидаги икки томонлама учрашувда олдинга силжиш бўлмаса ва уч томонлама учрашув муваффақиятсизликка учраса, иккиламчи ва бирламчи санкцияларни кучайтиришимизга тўғри келади”, дея таъкидлади Макрон.
Франция президенти Трамп, Зеленский ва Европанинг етакчи раҳбарлари билан учрашувдан сўнг, Украинага келажакда Россия томонидан можарони чўзиши ёки янги урушни келтириб чиқариши мумкин бўлган ҳар қандай ҳужумларнинг олдини олиш учун хавфсизлик кафолатларини бериш зарурлигини айтган.
“Агар сиз хавфсизлик кафолатлари бўлмаган ҳолда ҳар қандай тинчлик битимини имзоласангиз, Россия ҳеч қачон ўз сўзида турмайди ва мажбуриятларини бажармайди”, деб ҳисоблайди Макрон.
Унинг айтишича, Трампнинг 15 август куни Аляскада Путин билан учрашувининг асосий жиҳатларидан бири Украина учун хавфсизлик кафолатларини қабул қилгани умид бағишлайди.
Ўт очишни тўхтатиш эҳтимоли ҳақидаги саволга Макрон “жуда умид қиламан” деб жавоб берди, бироқ Россия жаҳон етакчилари делегацияси АҚШда бўлган пайтда ҳам Украинага зарбалар берганини таъкидлаган.
18 август куни кечқурун Трамп Зеленский ва Европа етакчилари билан музокаралар ўтказди. Очиқ қисм ярим соатдан сал камроқ давом этди. Музокараларда НАТО бош котиби Марк Рютте, Еврокомиссия раҳбари Урсула фон дер Ляйен, Буюк Британия бош вазири Кир Стармер, Франция президенти Эммануэл Макрон, Германия канцлери Фридрих Мерц, Финляндия президенти Александр Стубб, Италия бош вазири Жорж Мелони иштирок этди.
Трампнинг ўзи учрашувни “жуда самарали” деб атади. Унинг сўзларига кўра, томонлар АҚШ билан келишилган ҳолда Европанинг турли давлатлари томонидан тақдим этиладиган Украина учун хавфсизлик кафолатларини муҳокама қилган.
Изоҳ (0)