Toshkent shahrining Yangihayot tumanida rafiqasini salkam 20 marta pichoqlagan erkakning sud ishi ko‘rib chiqildi. Bu haqda “Milliy” telekanalida maʼlum qilindi.
Maʼlumotlarga ko‘ra, ushbu holat joriy yilning 1-fevral kuni Yangihayot tumanida sodir bo‘lgan. 1978-yilda tug‘ilgan er 1986-yilda tug‘ilgan xotini uyni sotishga norozi bo‘lganligi sabab uni pichoqlagan. Erkak giyohvandlik vositalariga ruju qo‘ygani aniqlangan.

“Shu orqamdan kelib, xo‘jayinim pichoqladilar. Men pichoq urayotganini bilmagandim, do‘pposlayapti deb o‘ylabman”, degan jabrlanuvchi.
Ko‘rsatilgan zarur tibbiy choralar sababli jabrlanuvchi ayolning hayoti saqlab qolingan.
Sud tomonidan erkakka nisbatan hukm o‘qilgan, ammo ayblanuvchi hukmdan norozi bo‘lib appelyatsiyaga bergan.
Toshkent shahar sudi appelyatsiya instansiyasida ko‘rib chiqilgan ishda Jinoyat kodeksining tegishli moddalari bilan tayinlangan uzil-kesil 15 yil-u 3 oylik ozodlikdan mahrum qilish jazosi o‘zgarishsiz qoldirildi.
Avvalroq Farg‘ona viloyati Qo‘qon shahrida xaridorni pichoqlagan do‘kon sotuvchisi 11 yilga qamalgani to‘g‘risida xabar qilingandi. Ushbu holatda xaridor va sotuvchi o‘rtasida kelib chiqqan janjal oqibatida jabrlanuvchi tan jarohatlari sababi voqea joyida halok bo‘lgan.
Izoh (0)