Тошкент шаҳрининг Янгиҳаёт туманида рафиқасини салкам 20 марта пичоқлаган эркакнинг суд иши кўриб чиқилди. Бу ҳақда “Миллий” телеканалида маълум қилинди.
Маълумотларга кўра, ушбу ҳолат жорий йилнинг 1 февраль куни Янгиҳаёт туманида содир бўлган. 1978 йилда туғилган эр 1986 йилда туғилган хотини уйни сотишга норози бўлганлиги сабаб уни пичоқлаган. Эркак гиёҳвандлик воситаларига ружу қўйгани аниқланган.
“Шу орқамдан келиб, хўжайиним пичоқладилар. Мен пичоқ ураётганини билмагандим, дўппослаяпти деб ўйлабман”, деган жабрланувчи.
Кўрсатилган зарур тиббий чоралар сабабли жабрланувчи аёлнинг ҳаёти сақлаб қолинган.
Суд томонидан эркакка нисбатан ҳукм ўқилган, аммо айбланувчи ҳукмдан норози бўлиб аппеляцияга берган.
Тошкент шаҳар суди аппеляция инстанциясида кўриб чиқилган ишда Жиноят кодексининг тегишли моддалари билан тайинланган узил-кесил 15 йил-у 3 ойлик озодликдан маҳрум қилиш жазоси ўзгаришсиз қолдирилди.
Аввалроқ Фарғона вилояти Қўқон шаҳрида харидорни пичоқлаган дўкон сотувчиси 11 йилга қамалгани тўғрисида хабар қилинганди. Ушбу ҳолатда харидор ва сотувчи ўртасида келиб чиққан жанжал оқибатида жабрланувчи тан жароҳатлари сабаби воқеа жойида ҳалок бўлган.
Изоҳ (0)