Buyuk Britaniyaning yadro bombalari saqlanadigan eng maxfiy bazalaridan birida eski quvurlarning yetarlicha ta’mirlanmagani sabab dengizga radioaktiv suv oqib chiqqan. Bu haqda The Guardian xabar berdi.
Rasmiy hujjatlarga ko‘ra, qirollik dengiz flotining yadro bombalari saqlanadigan bazasida eskirgan quvurlar bir necha bor yorilib, radioaktiv suv Glazgo yaqinidagi Loch Long qo‘ltig‘iga oqib tushgan.
Shotlandiya G‘arbidagi Koulport bazasi Buyuk Britaniyadagi eng himoyalangan va maxfiy harbiy obyektlardan biri bo‘lib, u Qirollik dengiz flotining suvosti kemalaridan uchiriladigan Trident raketalari uchun yadroviy kallaklarini saqlaydi.
Shotlandiya Atrof-muhitni muhofaza qilish agentligi (SEPA) ma’lumotlariga ko‘ra, voqea yuz bergan vaqtda bazadagi komponentlarning qariyb yarmida foydalanish muddati tugagan edi. SEPA, hodisaga “ta’mirlashdagi kamchiliklar” sabab bo‘lganini va natijada yadroviy kallaklarda ishlatiladigan tritiy izotopi dengizga sizib chiqqanini bildirdi.
2022-yilgi hisobotida SEPA Qirollik dengiz kuchlarini ombor hududidagi jihozlarga yetarlicha e’tibor qaratmaslikda ayblagan. Boisi 1 500 ta eskirgan suv quvurlarini almashtirish rejasi “optimal emas” deya baholangan edi.
Hodisani yashirishga urinishlar
Hukumat va qurolli kuchlar hodisani yashirishga uringan. Biroq ma’lumotlar sirli tekshiruv hisobotlari va elektron xatlar orqali fosh bo‘lgan. Natijada Shotlandiya Axborot bo‘yicha komissari Devid Xemilton jurnalistlarning so‘rovlaridan so‘ng hodisani ochiqlashga majbur bo‘lgan.
Britaniya Mudofaa vazirligi buni “milliy xavfsizlik” vaji bilan maxfiy saqlashga urindi, biroq komissar hujjatlarning oshkor bo‘lishi mamlakat xavfsizligiga emas, balki “obro‘ga” tahdid solishini ta’kidladi.
Izoh (0)