Buyuk Britaniyaning Romford shahrida yashovchi 42 yoshli ikki farzandning otasi Metyu Allik yurak xurujidan keyin bir necha daqiqa davomida klinik o‘lim holatini boshidan kechirdi. U hushiga kelgach, xuddi “tinch uyqudan uyg‘ongandek” bo‘lganini aytdi. Bu haqda Daily Mail xabar berdi.
Metyu 2023-yil avgust oyida o‘zida nafas qisishi va oyoqlar shishishi kabi belgilarni sezgan bo‘lsa-da, u buni tungi smenada ishlash oqibati deb o‘ylab, ahamiyat bermagan. Bir kuni u ishxonada hatto bitta zinapoyaga ham chiqa olmagach, hamkasbidan tez yordam chaqirishni so‘ragan.
Shifoxonaga yetib borgach, Metyuning yuragi to‘satdan to‘xtab qolgan. Shifokorlar defibrillyator va yurak massaji yordamida uni hayotga qaytarishga muvaffaq bo‘lgan. Tibbiy tekshiruvlar uning yuragi va o‘pkasida kriket to‘pi kattaligida qon quyqalari borligini aniqlagan. Jarrohlar bir nechta operatsiyalar o‘tkazib, qon quyqalarini kateter yordamida kesib olib tashlagan va bemorga ko‘p miqdorda qon quygan.
Metyu hushiga kelgach, vaqtincha ranglarni farqlash, odamlarning ismlarini eslab qolish va oddiy harakatlarni bajarishda muammolarga duch kelgan. Ammo u asta-sekin sog‘lig‘ini tiklab, hozir o‘zini 75 foiz oldingi holatiga qaytganini ta’kidlamoqda.
“O‘lganimdan keyin nima bo‘lganini aniq eslay olmayman. Ammo esimda qolgani komadan chiqayotganimda, o‘zimni xuddi uyqudan turayotgandek his qildim. Hammayoq tinch edi. Bu menga sokin uyquga o‘xshab tuyuldi”, dedi Metyu.
Shifokorlar uning tirik qolishini mo‘jiza deb atamoqda. Statistikaga ko‘ra, bunday holatlarda bemorlarning atigi 5 foizi omon qoladi. Metyu hayoti asrab qolinishida qon quyish ham muhim rol o‘ynaganini aytarkan, qon donorligi, ayniqsa qora tanli aholi orasida katta ahamiyatga egaligini ta’kidlagan.
“Kimningdir qon topshirish qarori mening hayotimni saqlab qoldi. Biz buning qanchalik muhimligini faqat o‘z boshimizga ish tushgandagiga anglaymiz”, deb qo‘shimcha qilgan bemor.
Izoh (0)