Буюк Британиянинг Ромфорд шаҳрида яшовчи 42 ёшли икки фарзанднинг отаси Метю Аллик юрак хуружидан кейин бир неча дақиқа давомида клиник ўлим ҳолатини бошидан кечирди. У ҳушига келгач, худди “тинч уйқудан уйғонгандек” бўлганини айтди. Бу ҳақда Daily Mail хабар берди.
Метю 2023 йил август ойида ўзида нафас қисиши ва оёқлар шишиши каби белгиларни сезган бўлса-да, у буни тунги сменада ишлаш оқибати деб ўйлаб, аҳамият бермаган. Бир куни у ишхонада ҳатто битта зинапояга ҳам чиқа олмагач, ҳамкасбидан тез ёрдам чақиришни сўраган.
Шифохонага етиб боргач, Метюнинг юраги тўсатдан тўхтаб қолган. Шифокорлар дефибриллятор ва юрак массажи ёрдамида уни ҳаётга қайтаришга муваффақ бўлган. Тиббий текширувлар унинг юраги ва ўпкасида крикет тўпи катталигида қон қуйқалари борлигини аниқлаган. Жарроҳлар бир нечта операциялар ўтказиб, қон қуйқаларини катетер ёрдамида кесиб олиб ташлаган ва беморга кўп миқдорда қон қуйган.
Метю ҳушига келгач, вақтинча рангларни фарқлаш, одамларнинг исмларини эслаб қолиш ва оддий ҳаракатларни бажаришда муаммоларга дуч келган. Аммо у аста-секин соғлиғини тиклаб, ҳозир ўзини 75 фоиз олдинги ҳолатига қайтганини таъкидламоқда.
“Ўлганимдан кейин нима бўлганини аниқ эслай олмайман. Аммо эсимда қолгани комадан чиқаётганимда, ўзимни худди уйқудан тураётгандек ҳис қилдим. Ҳаммаёқ тинч эди. Бу менга сокин уйқуга ўхшаб туюлди”, деди Метю.
Шифокорлар унинг тирик қолишини мўжиза деб атамоқда. Статистикага кўра, бундай ҳолатларда беморларнинг атиги 5 фоизи омон қолади. Метю ҳаёти асраб қолинишида қон қуйиш ҳам муҳим рол ўйнаганини айтаркан, қон донорлиги, айниқса қора танли аҳоли орасида катта аҳамиятга эгалигини таъкидлаган.
“Кимнингдир қон топшириш қарори менинг ҳаётимни сақлаб қолди. Биз бунинг қанчалик муҳимлигини фақат ўз бошимизга иш тушгандагига англаймиз”, деб қўшимча қилган бемор.
Изоҳ (0)