Qoraqalpog‘istonning Ellikqal’a tumanidagi maktablarning birida uch kishi sinfga bostirib kirib, bolani majburan olib chiqib ketgani aks etgan video tarqaldi. Bolalar ombudsmani mazkur holat o‘rganilayotganini ma’lum qildi.
Aniqlanishicha, 5-sentyabr kuni Ellikqal’a tumanidagi 28-maktabning 1-sinf o‘quvchisi bo‘lgan bola X.Yo.ning onasi S.Sh. dars jarayonini buzgan holda sinfga kirib borib, o‘qituvchi uni to‘xtatishga urinishiga qaramasdan, kuch ishlatib majburan o‘g‘lini sinfdan olib ketgan.
Holat yuzasidan S.Sh. va boshqa shaxslarga nisbatan ma’muriy huquqbuzarlikka oid tegishli hujjatlar to‘planib, sudga yuborilgan. 20-sentyabr kuni mazkur ish sudda ko‘rib chiqiladi.
“Ushbu vaziyat bolaning kim bilan yashashiga oid qarindoshlar o‘rtasidagi nizo oqibatida yuzaga kelgan bo‘lib, mazkur masala yuzasidan hujjatlar sud tartibida hal qilinishi uchun taqdim etilgan”, deyiladi xabarda.
Qayd etilishicha, X.Yo.ning hozirda ta’lim olish huquqi tiklanib, bola maktabda o‘qishini davom ettirmoqda.
Izoh (0)