G‘azo sektorida ochlikning tarqalishi inson qo‘li bilan yaratilgan falokatdir. Bu haqda Birlashgan Millatlar Tashkiloti (BMT) bosh kotibi Antoniu Guterrishning BMT rasmiy veb-saytida e’lon qilingan bayonotida ma’lum qilindi.
“G‘azodagi jahannamni tasvirlash uchun so‘z qolmagandek tuyulganida, yana bir so‘z qo‘shildi: ‘ochlik’. Bu jumboq emas — bu inson qo‘li bilan yaratilgan falokat, axloqiy hukm va insoniyatning o‘z muvaffaqiyatsizligidir”, dedi xalqaro tashkilot bosh kotibi.
Shuningdek, Guterrish ochlik insoniyatning yashab qolishi uchun zarur bo‘lgan tizimlarni ataylab vayron qilish ekanini ta’kidlagan. Uning so‘zlariga ko‘ra, Isroil anklav aholisini zarur oziq-ovqat va dori-darmonlar bilan ta’minlash bo‘yicha “so‘zsiz majburiyatlar”ga ega.
BMTning “Oziq-ovqat xavfsizligi bosqichlarining integratsiyalashgan tasnifi” (IPC) tashabbusi ilk bor G‘azo sektorida ocharchilik mavjudligini rasman tasdiqladi.
IPC tasnifni o‘tkir oziq-ovqat tanqisligi shkalasining eng yuqori darajasi hisoblangan 5-bosqichga ko‘tardi.
Tashkilot hisobotida aytilishicha, sentyabr oyi oxiriga kelib G‘azodagi vaziyat “fojiali darajaga” yetadi. Shuningdek, to‘yib ovqatlanmaslik kelasi yilning iyun oyigacha G‘azoda besh yoshgacha bo‘lgan 132 ming bolaning hayotiga xavf solishi ta’kidlangan.
IPS o‘zining 59 sahifali hisobotida “tezkor va keng ko‘lamli choralar ko‘rish”ga chaqirmoqda.
“Har qanday kechikish — hatto bir necha kunlik bo‘lsa ham — ochlik bilan bog‘liq o‘limning mutlaqo qabul qilib bo‘lmaydigan darajada ko‘payishiga olib keladi”, deyiladi hisobotda.
Isroil hukumati IPC hisobotini qat’iy rad etib, uni “yolg‘on va noxolis” deb atadi. Isroilning yordamni muvofiqlashtiruvchi harbiy tashkiloti COGAT “hisobot HAMASdan olingan qisman, noxolis ma’lumotlar va yuzaki axborotlarga asoslanganini” ta’kidlagan.
Izoh (0)