Jinoyat ishlari bo‘yicha Namangan viloyatining Chust tumani sudi raisi Jahongir Yoqubxo‘jayev o‘z yordamchisi Shohjahon Yaxshiboyevni kaltaklab, unga jarohat yetkazganlikda gumonlanmoqda.
Voqea 2025-yilning 18-yanvar kuni sodir bo‘lgan. “Kun.uz”ning yozishicha, sud raisi Jahongir Yoqubxo‘jayev yordamchisi Shohjahon Yaxshiboyevni o‘zining xizmat xonasida kaltaklagan. Jarohat olgan yordamchi To‘raqo‘rg‘on tuman tibbiyot birlashmasiga murojaat qilgan. Tibbiy ma’lumotnomada u yuz sohasi yumshoq to‘qimalari lat yeyish jarohatini olgani ko‘rsatilgan.
Bosh prokuratura axborot xizmati rahbari Hayot Shamsutdinov hodisa yuz berganini tasdiqladi va Chust tuman prokuraturasi tomonidan tergovga qadar tekshiruv harakatlari olib borilayotganini ma’lum qildi.
Sudyalar oliy kengashi holat yuzasidan xizmat tekshiruvi tayinlanganini bildirdi.
Bundan avval Jinoyat ishlari bo‘yicha Qashqadaryo viloyati Yakkabog‘ tuman sudining raisi Adolat Xamrayeva odobsizlik qilganiga oid xabar tarqalgandi. Oliy sud raisi prokuror bilan pichirlashgan sudyalarni tanqid qilgandi.
Izoh (0)