“Daryo”da Qashqadaryo viloyatining Nishon tumanida faoliyat yurituvchi fermer va MIBning tuman bo‘limi o‘rtasidagi iqtisodiy nizo Oliy sudda ko‘rilayotgani, sudlov hay’ati a’zolarining ayrim xatti-harakatlari fermer va uning advokatida ishning xolis ko‘rilishiga shubha uyg‘otgani haqida hikoya qilingandi. Sudyalar oliy kengashi mazkur holat tilga olingan maqolaga munosabat bildirdi.
Shu mazmundagi xabarlarda sudlov hay’ati a’zolari va ish bo‘yicha taraf hisoblangan prokuratura xodimi o‘rtasida (sud majlisi boshlanishidan avval) alohida, go‘yoki sirli suhbat bo‘lib o‘tganiga urg‘u beriladi. Aytish kerakki, bo‘lib o‘tgan sud majlislari hamda qabul qilingan sud qarori sudlov hay’atiga nisbatan shubha va e’tirozlar asossiz ekanini tasdiqlaydi. Chunki yakunda masala holatdan jiddiy norozi bo‘lgan fermer foydasiga hal bo‘lgan. Bu haqda ayrim ijtimoiy tarmoqlarda ham bir emas, bir qancha axborotlar tarqatildi, deyiladi mas’ullar izohida.
Sudyalar oliy kengashi axborot xizmati Sudyalar odobi kodeksiga ko‘ra, sudya har qanday vaziyatda sudning xolisligi, mustaqilligi va beg‘arazligiga shubha tug‘dirishi mumkin bo‘lgan xatti-harakatlardan o‘zini tiyishi shartligini eslatgan.
Sud majlisiga tayyorgarlik jarayonidagi sudlov hay’ati a’zolarining xatti-harakatlarida mazkur qoida formal buzilganidan kelib chiqib, tegishli malaka hay’atiga shu va shu kabi holatlarning oldini olish borasida qo‘shimcha choralar ko‘rish tavsiya qilindi, deyiladi bu haqdagi munosabatda.
Oliy sud raisi o‘rinbosari Ikrom Muslimov OAV vakillari bilan bo‘lib o‘tgan matbuot anjumanida sud majlisiga qadar prokuror bilan yashirin suhbat qurgan sudyalar haqida gapirib, bu ularning kamchiligi ekanini tan olgandi.
Bu sudyalarimizning kamchiligi. Bu haqda har safar aytiladi, munosabat bildiriladi. Endi ayrim holatlarda shu narsa bo‘lib qolyapti, degandi Ikrom Muslimov.
Izoh (0)