Prezident Shavkat Mirziyoyev 31-dekabr kuni “Mamlakatning ijtimoiy, siyosiy va iqtisodiy rivojlanish sohalaridagi strategik tahlil va tadqiqot qilish faoliyatini samarali tashkil etish chora-tadbirlari to‘g‘risida”gi qarorni imzoladi. Bu haqda Adliya vazirligi xabar berdi.
Qarorga asosan, Tahliliy va tadqiqot tuzilmalar faoliyatini tashkil qilish bo‘yicha Muvofiqlashtiruvchi kengash tashkil etildi.
- Ijtimoiy, siyosiy va iqtisodiy rivojlanish bo‘yicha uzoq muddatli strategik tahliliy hujjatlarni va mamlakatning ichki va tashqi siyosatiga oid takliflarni muntazam ravishda prezidentga kiritib borish Muvofiqlashtiruvchi kengashning asosiy vazifalaridan biri bo‘ladi.
Muvofiqlashtiruvchi kengash ichki va tashqi siyosat jarayonlari bo‘yicha strategik tadqiqotlarni tashkil qilish, ularni o‘tkazishning barcha jarayonlarini muvofiqlashtirish masalalariga masʼul maslahat organi hisoblanadi.
Kengash faoliyatini to‘g‘ri yo‘lga qo‘yish, umumiy muvofiqlashtirish hamda idoralararo hamkorlikni taʼminlash prezidentning Maxsus topshiriqlar bo‘yicha maslahatchisi Sardor Umrzoqov tomonidan amalga oshiriladi.
Kengash tuzilmasida quyidagi yo‘nalishlarga masʼul bo‘lgan ishchi guruhlar tashkil etiladi:
- xavfsizlik va ijtimoiy barqarorlik;
- davlat va jamiyat qurilishi;
- ijtimoiy-iqtisodiy rivojlanish;
- tashqi siyosat va xalqaro hamkorlik;
- hududlarni strategik rejalashtirish va rivojlantirish;
- ekologik kun tartibi, shu jumladan iqlim o‘zgarishi, suv taqchilligi masalalari.
Izoh (0)