Shavkat Mirziyoyev Musulmonlar idorasi raisi, muftiy shayx Nuriddin Xoliqnazar bilan telefon orqali muloqot qildi. Bu haqda Prezident matbuot xizmati xabar berdi.
Davlat rahbari Saudiya Arabistoniga qilgan tashrifi davomida o‘tkazilgan muzokaralar natijasida joriy haj mavsumiga boshqacha tayyorgarlik ko‘rilgani, yangidan yangi tizimlar joriy etilganini taʼkidladi.
“Eʼtibor mutlaqo boshqacha bo‘lyapti. Shuni hozir ziyoratga borgan ziyoratchilarimiz sezyaptimi? Kayfiyatlaringiz qanday, sharoitlarda yana nima yetishmaydi, qanday tajriba orttirildi, kelgusida qilinishi kerak bo‘lgan ishlar bo‘yicha, otaxon va onaxonlarimizning kayfiyatlari, sog‘liklari qanday?” — deb so‘radi prezident.
Shayx Nuriddin Xoliqnazar Shavkat Mirziyoyevga, avvalo, muborak joylarda ibodat fayzi bilan yurgan hojilarning salomi va duolarini yetkazdi.
“Hojilarimiz shu qadar xursandki, ko‘zlarida yosh bilan duolar qilyapti. Shaxsan o‘zingiz bir necha marta inson qadri, hojilarimiz qaysi yurtda bo‘lsa ham, hurmati, qadri bilan bo‘lsin, degan topshirig‘ingiz asosida mehmonxonalarda hamma sharoitlar yaratildi. Kuni kecha Saudiya Arabistoni Sog‘liqni saqlash vazirligi va mutasaddi tashkilotlardan kelib, mehmonxonada shifoxonada qilganimizni ko‘rib, davlat rahbariga ming rahmat, biror-bir davlatda bunaqa narsa yo‘q, deb, o‘zlari xayron qolib ketishdi.
Yettita mehmonxona olgan bo‘lsak, har biriga mutasaddilar ajratildi. 24 soat transport qo‘yilgan, birorta hojimizda boshqa transportga ehtiyoj yo‘q. O‘zbekiston yozuvi bilan har bir joyda kuzatuvchilar bilan olib borib, olib kelyapti. Haramda ham ibodatga hamma sharoit qilingan”, — deydi muftiy.
Hududlardagi Haj markazlari orqali ishlar uyushqoqlik bilan olib borildi. Vazirlar Mahkamasi boshchiligida Din ishlari bo‘yicha qo‘mita, Tashqi ishlar vazirligi, Transport vazirligi, Sog‘liqni saqlash vazirligi va boshqa tuzilmalar hamkorligida ziyoratchilar uchun barcha sharoit yaratildi.
Ayni paytda qariyb 12 ming nafar yurtdoshimiz Saudiya Arabistonida bo‘lib turibdi. Jami 15 ming 130 nafar fuqaro haj ibodatiga muyassar bo‘ladi. Ularga 300 nafar guruh rahbari, 50 nafar oliy toifali shifokor, oshpazlar, tarjimonlar va boshqa ko‘makchilar hamrohlik qiladi.
Bu kabi eʼtibor va sharoitlarni arabistonlik mutasaddilar ham yuqori baholab, O‘zbekiston prezidentiga hurmat va duolarini izhor etmoqda.
Bu yildan boshlab bir yangilik — Saudiya Arabistonida bo‘lib turgan diniy soha xodimlari hamda qori ziyoratchilar tomonidan Qurʼoni karimni xatm qilish yo‘lga qo‘yildi. Hozirgacha 1 ming 515 ta xatm o‘qilib, O‘zbekistonga tinchlik, xalqimizga farovonlik tilab duolar qilingan.
Davlat rahbari yurtdoshlarimiz muqaddas haj ibodatini mukammal ado etib, sog‘-omon kelishlarini tiladi. O‘zbekistonga qaytgach, hojilar jamiyatdagi mehr-oqibat muhitini mustahkamlash, jaholatga qarshi maʼrifat bilan kurashish, yoshlar tarbiyasi va oilalar totuvligida ibrat bo‘lishlariga umid bildirdi.
Suhbat samimiy va ko‘tarinki ruhda o‘tdi.
Izoh (0)