Boy odamlarning asosiy siri — ular ham boshqalar kabi tejashga harakat qilishadi. Har qanday byudjetni to‘g‘ri rejalashtirish moliyaviy nazorat qilishga yordam beradi va “oy oxirigacha qanday yetkazish” haqida bosh og‘rig‘ini kamaytiradi. Mutaxassislar esa qayerdan tejash mumkinligini aniqlab, ortiqcha xarajatlardan qochish yo‘llarini aytdi.
Sport zaliga abonement
Sport zaliga abonement sotib olganlarning faqat oz qismi u yerga muntazam boradi. Agar sizda hali muntazam shug‘ullanish odati shakllanmagan bo‘lsa, bunday obuna pulni behuda sarflash bo‘lishi mumkin. Buning o‘rniga uyda bajariladigan mashg‘ulot dasturlarini ko‘rib chiqing yoki yoga, raqs, zumba va shu kabi boshqa guruhli mashg‘ulotlarga yoziling. Bu orqali oilaviy byudjetga zarar yetmaydi, sog‘lig‘ingiz esa yaxshilanadi.
Yangi kiyim sotib olish
Yangi kiyim olishdan oldin bu sizga haqiqatan kerakmi yoki yo‘q, o‘ylab ko‘ring. Agar zamonaviy kiyim izlayotgan bo‘lsangiz, ikkinchi qo‘l do‘konlariga e’tibor qarating. Hozirda bu kabi do‘konlar o‘rnini bosadigan ko‘plab saytlar ham bor. Vintaj kiyimlar — bu 25 yildan ortiq “yoshi”ga ega kiyimlar bo‘lib, ular noodatiy ko‘rinishga ega bo‘lishni istaganlar uchun juda mos keladi. Internetda vintaj kiyimlarni arzon narxda topish mumkin.
Bolalar uchun tovarlar va o‘yinchoqlar
Ota-onalarga doim nimanidir sotishga harakat qilishadi, lekin bu narsalarning 90 foizi aslida kerak emas. Masalan, salfetka ilitgich, “maxsus” tagliklar, bolani bir zumda tinchlantiradigan belanchak va hokazo. Ishlab chiqaruvchilar uyda yangi tug‘ilgan chaqaloq bilan bo‘lishni tinchlik va uyg‘unlikka to‘la deb ko‘rsatmoqchi bo‘lishadi. Biroq tajribali ota-onalar bu narsalarning ko‘pi shunchaki pul sarflash uchun sabab ekanini yaxshi bilishadi.
Yangi qurilma yoki “mo‘jizaviy” taglik sotib olishdan oldin internetda izlaning. Ota-onalar o‘z tajribalari bilan bo‘lishadi, bu esa boshqalarga ortiqcha xarajatlardan qochishda yordam beradi. Xuddi shuningdek, o‘yinchoqlarning ham aksariyati deyarli “bir martalik”, chunki bola ulardan tez zerikadi.
TV kanal paketlari
150 ta internet-kanal uchun pul to‘lab, ularning faqat 2–3 tasini tomosha qilayotgan bo‘lsangiz — bu behuda xarajat. Hozir ko‘pchilik striming xizmatlaridan foydalanmoqda. Bu xizmatlar siz yoqtirgan seriallar va shoularni ham ishlab chiqaradi. Ularning obunasi esa ko‘p hollarda kabel televideniyesi paketlaridan ancha arzon tushadi.
Uydan tashqarida ovqatlanish
Ishdagi biznes-lanchlar, avtomatdan olingan qahva, uyga qaytayotganda yo‘lda yeyilgan hotdog — bularning barchasi moliyaviy jihatdan sezilmaydi, lekin oxir-oqibat jiddiy xarajatga aylanadi. Uyda ovqat tayyorlash esa arzonroq va sog‘lomroq. Ozroq qunt qilinsa, bu ko‘p vaqt olmaydi. Internetda konteynerda olib yurishga qulay, oqib ketmaydigan ko‘plab yengil va to‘yimli taomlar retseptlari bor.
Yeyilmaydigan mahsulotlar
Ko‘pincha maoshgacha yetkazish qiyin bo‘lsa-da, baribir ba’zi oziq-ovqatlarni tashlab yuboramiz. Aslida esa u bilan birga pulimizni ham axlatga tashlaymiz. Buning oldini olish uchun bir necha oddiy qoidaga amal qilish kifoya:
- faqat uzoq muddat saqlanadigan mahsulotlarni ko‘p miqdorda oling;
- haftalik menyu tuzing va faqat kerakli narsalarni xarid qiling;
- yaroqlilik muddatini tekshirib boring;
- do‘konga borishdan oldin to‘q holda boring — och xaridor eng ko‘p xarajat qiladigan xaridordir.
Izoh (0)