Bitkoin narxi 22-may kuni tarixda birinchi marta Binance kriptobirjasida 111 ming dollardan oshdi. Bu haqda CNBC xabar berdi.
Toshkent vaqti bilan soat 08:45 da kriptovalyuta 111 880 dollardan sotildi, keyinroq kurs biroz pasaydi. Bitkoinning 21-may kungi qiymati ilk bor 109,5 ming dollarga yetgandi. AQSH prezidenti Donald Trampning aprel oyida keng ko‘lamli savdo bojlarini joriy etish haqidagi bayonoti fond indekslarida pasayishga sabab bo‘lgandi. Natijada bitkoin kursi 75 ming dollardan pastlagandi. Biroq bojlarini joriy etishdagi pauza sababli kriptovalyutaning qiymati yana ko‘tarila boshladi.
Bitkoin narxi oshishiga AQSHda inflyatsiya darajasi pasayishi, AQSH va Xitoy o‘rtasidagi savdo urushi yumshashi, va Moody’s reyting agentligi tomonidan AQSH davlat qarzi bahosining tushirilishi sabab bo‘ldi, deydi Nexo kriptobirjasi asoschilaridan biri Antoni Trenchev.
U AQSH va Xitoy o‘rtasidagi kengroq savdo kelishuvi ustida muzokaralar olib borilayotgani sababli, tavakkalchilikka asoslangan aktivlar uchun uch oylik “imkoniyatlar oynasi” ochilganini ta’kidladi.
Bitkoinning hozirgi bozor kapitallashuvi taxminan 2,18 trillion dollarni tashkil etadi. Bu Tesla, Amazon, Alphabet va dunyodagi eng qimmat uchta kompaniya: Microsoft, Apple va Nvidia’dan tashqari boshqa ko‘plab kompaniyalarning kapitallashuvidan ham yuqoridir.
Izoh (1)
ha ancha yaxsh ku