Bitkoin bozor kapitallashuvi bo‘yicha eng qimmat aktivlar reytingida kumushdan o‘zib ketdi. Kriptovalyuta narxi 89 ming dollardan oshib, rekord o‘rnatdi. Ma’lumotlar Binance birjasida e’lon qilindi.
Donald Trampning AQSH prezidenti saylovidagi g‘alabasi bilan boshlangan bitkoin narxining o‘sishi hali ham davom etmoqda. Soat 11:00 holatiga ko‘ra, bitkoin 88,501 dollardan sotilmoqda, kriptovalyutaning bozor kapitallashuvi 1,751 trillion dollarga yetdi. Kumush esa 1,711 trillion dollar kapitallashuvda 30,40 dollardan sotilmoqda.
Nima uchun bitkoin narxi oshmoqda?
Kriptovalyuta bozori Trampning va’dalari amalga oshirilishini kutmoqda. Siyosatchi kriptobozorining rivojlanishini qo‘llab-quvvatlashni bildirgan. Uning tashabbuslaridan biri AQSHda bitkoin zaxirasini shakllantirishni nazarda tutadi. Kriptobozor o‘sishining yana bir omili AQSH Federal zaxirasining asosiy foiz stavkasini pasaytirish yo‘lidagi harakati bo‘ldi. O‘zgarishlar bitkoin kabi yuqori xavfli aktivlarning investitsion jozibadorligini oshiradi.
Shuningdek, kechiktirilgan halving effekti kriptobozorga ta’sir qilgan bo‘lishi mumkin. Bu hodisa kriptovalyuta mayningi tezligini ikki baravar pasaytiradi, bu esa vaqt o‘tishi bilan uning tanqisligiga olib keladi. Kuzatishlar tarixi shuni ko‘rsatadiki, o‘zgarishlar tanga kursini keskin oshiradi.
O‘sishda davom etish bitkoinning eng ko‘p kapitallashgan aktivlar reytingida yuqoriga ko‘tarilishida yordam beradi. Biroq yetakchilikni boy bermaydigan oltinga yetib olish qiyin. Sarmoyadorlar an’anaviy ravishda jamg‘armalarini inflyatsiyadan himoya qilish uchun foydalanadigan qimmatbaho metallning kapitallashuvi — 17,545 trillion dollar, bu bitkoin natijasidan 10 baravar yuqoridir.
Izoh (0)