Braziliyada kuniga uch litrdan kola ichgan erkakning qovug‘idagi 35 ta tosh olib tashlandi. Bu haqda Daily Mail xabar berdi.
Braziliyalik urolog Tales Andrade bemor haqida maʼlumot bergan. U bunday patologiya sabablaridan biri gazlangan ichimliklarni haddan ziyod iste’mol qilish ekanini aytgan. Jumladan, erkak kuniga uch litrgacha kola ichgan.
Shifokorning tushuntirishicha, muntazam ravishda gazlangan ichimliklar ichish siydik ajratish tizimi uchun jiddiy oqibatlarga olib keladi. Kola tarkibida ko‘p miqdorda qand va fosfat kislotasi mavjud, ular peshobning kislotaliligini oshiradi va tosh hosil bo‘lishiga sabab bo‘ladi. Shu sababli bemorda siydik-tosh kasalligining og‘ir shakli rivojlangan.
Buyrakda hosil bo‘lgan toshlar qovuqqa o‘tib, kuchli og‘riq, siydik ajralishining buzilishi, siydikda qon bo‘lishi va boshqa noxush holatlarni keltirib chiqarishi mumkin. Agar ular o‘z vaqtida davolanmasa, yallig‘lanish va hatto buyrak yetishmovchiligiga olib kelishi mumkin.
Andrade sog‘lom ovqatlanish va yetarli miqdorda suv iste’mol qilish muhimligini ta’kidlamoqda. U odamlarni suv o‘rniga gazli ichimliklarni ichish odatidan voz kechishga chaqirgan. Ayniqsa, qorin yoki orqa sohada noqulayliklar hamda siydik chiqarishda muammolar bo‘lsa.
Izoh (0)