Germaniyaning Eisenhuttenstadt shahri o‘z aholisi sonini ko‘paytirish maqsadida odamlarni ko‘chib kelishga undash uchun ikki haftalik bepul turar joy taklif qilmoqda. Bu haqda CNN xabar berdi.
Shahar mahalliy kengashiga ko‘ra, ko‘chib kelishni rejalashtirayotganlarga 14 kunlik bepul sinov muddati taklif qilinmoqda. Arizalar 2025-yilning iyul oyigacha qabul qilinadi.
“Ushbu loyiha Eisenhuttenstadtga ko‘chib kelishga qiziqqan har qanday kishiga mo‘ljallangan — masalan, ishga qatnovchilar, shaharga qaytmoqchi bo‘lganlar, malakali ishchilar yoki havo almashtirmoqchi bo‘lganlar”, deyiladi bayonotda.
Tanlangan ishtirokchilar 6-sentyabrdan 20-sentyabrgacha shaharda jihozlangan kvartirada bepul yashash imkoniga ega bo‘ladi. Bu “Make Plans Now” deb nomlangan innovatsion immigratsiya loyihasi doirasida amalga oshiriladi. Ishtirokchilar 14 kun davomida shahardagi hayotni yaqindan o‘rganadi. Buning uchun turli tadbirlar tashkil etiladi. Shahar bo‘ylab sayohat, zavodga tashrif va boshqa ko‘ngilochar chiqishlar shular jumlasidandir. Shuningdek, ishtirokchilarga doimiy qolish imkoniyati ham berilishi ham mumkin.
1950-yilda tashkil topgan Berlindan 60 mil uzoqlikda joylashgan Eisenhuttenstadt shahri sobiq Sharqiy Germaniyaning sotsialistik shahri hisoblanadi. Dastlab Stalin shahri (Stalinstadt) deb atalgan, ammo 1989-yilda Berlin devori qulagach va Germaniya birlashgach, Eisenhuttenstadt nomiga o‘zgargan. Sharqiy Germaniyaning ko‘plab shahar va qishloqlari singari, bu yerda ham aholi soni Germaniya birlashgandan keyin kamaygan. Ilgari 50 mingdan ko‘p bo‘lgan aholi hozir taxminan 24 mingga baholanmoqda.
Izoh (0)