11-aprel kuni O‘zbekiston musulmonlari idorasi raisi, muftiy Nuriddin domla Xoliqnazarov “Xadichai Kubro” ayol-qizlar o‘rta maxsus islom ta’lim muassasasiga tashrif buyurib, ushbu madrasaning yangi binosi ochilishi marosimida ishtirok etdi. Bu haqda O‘zbekiston musulmonlari idorasi xabar qildi.

Ma’lum bo‘lishicha, muftiy bilim yurtining ustoz va talaba-qizlarini yangi bino bilan tabriklab, dinda ayol-qizlarning o‘rni, mamlakatda xotin-qizlar ta’lim-tarbiyasiga qaratilayotgan e’tibor va diniy-ma’rifiy sohadagi ayol-qizlarning faolligi to‘g‘risida suhbat qilgan.

“Tashrif asnosida Muftiy hazratlari talaba-qizlarning ta’lim-tarbiya olishi uchun yaratilgan shart-sharoitlar, dars jarayonlarida ularning hozirjavobligi, xorijiy tillarda erkin so‘zlashayotgani, o‘z mutaxassisligi bilan birga zamonaviy ilmlarni ham yaxshi o‘zlashtirayotganlarini ko‘rib, mamnun bo‘ldilar. Eng faol talaba qizlar O‘zbekiston musulmonlari idorasi tomonidan rag‘batlantirildi. Bilim yurti ustoz va talabalari uchun iftor dasturxoni yozildi”, — deyiladi xabarda.

Ma’lumot uchun, ta’lim muassasasining yangi binosi 15 ta o‘quv xonasi, 1 ta majlislar zali, 1 ta umumiy dars o‘tish xonasi, shuningdek, kutubxona, qiroatxona, informatika va arxiv xonadan tashkil topgan. O‘quv binosidagi har bir xona maxsus fanlarga ixtisoslashgan bo‘lib, xususan, tafsir, fiqh, hadis, arab tili, islom tarixi, aqoid, tahfizul Qur’on, xorijiy tillar, tikuvchilik xonalariga muvofiq jihozlangan. Bundan tashqari, muassasa hududida 50 kishiga mo‘ljallangan talabalar turar joyi ham bo‘lib, unda barcha zarur shart-sharoitlar muhayyo etilgan.