Irlandiyadagi offshor orollardan birida tashlandiq ko‘chmas mulk sotib olgan chet ellikka 84 ming yevrogacha mablag‘ beriladi. Bu 2023-yil iyulda ishga tushirilgan “Tashlandiq ko‘chmas mulkni qayta tiklash granti” dasturi doirasida taqdim etiladi. Bu haqda This is Money nashri xabar berdi.
Irlandiyada uy-joy
Hukumat dasturi orollarda aholi sonini ko‘paytirish, uy-joylarni tiklash, infratuzilmani yaxshilash, sog‘liqni saqlash va ta’lim sohasidagi asosiy xizmatlardan foydalanish imkoniyatlarini kengaytirishga qaratilgan.
Katta miqdordagi grantlar faqat 2007-yildan oldin foydalanishga topshirilgan uylarni sotib olishga tayyor bo‘lganlarga beriladi. Bundan tashqari, ko‘chmas mulk kamida ikki yil davomida bo‘sh turgan bo‘lishi shart.
Grant doirasida jami 23 ta aholi yashaydigan offshor orolni ko‘rib chiqish mumkin. 2016-yilda o‘tkazilgan aholini ro‘yxatga olish ma’lumotlariga ko‘ra, bu orollarda jami 2734 kishi istiqomat qilgan.
Ta’mirlash
Yangi uy egalari bo‘sh uylarni ta’mirlash uchun 60 ming yevrogacha yoki ko‘chmas mulk obyekti butunlay qarovsiz bo‘lsa, 84 ming yevrogacha mablag‘ olishi mumkin.
Grant miqdori mahalliy hokimiyat tomonidan tasdiqlangan ishlar ko‘lamiga bog‘liq bo‘lib, hisob-faktura va kvitansiya kabi hujjatlar asosida to‘lanadi. Shundan so‘ng, uy-joyni ijaraga berish yoki to‘lov olingan kundan boshlab kamida 10 yil davomida xorijlik u yerda yashashi mumkin bo‘ladi.
Maksimal 84 ming yevro miqdorida grant olishni xohlovchilar uchun bunday uylarni Irlandiya mahalliy boshqaruv organlari tomonidan tuzilgan tashlandiq obyektlar ro‘yxatidan topish mumkin.
Izoh (0)