Ўзбекистон аҳолиси 2023 йилда 40 мингга яқин экологик ҳуқуқбузарлик содир этган бўлиб, бунинг учун 32 миллиард 700 миллион сўмлик жарима тайинланган. Бу ҳақда Экология вазирлиги ҳузуридаги Экологик экспертиза маркази директори ўринбосари Адҳам Қурбонов маълум қилди.
Бугун, 2 апрель куни АОКАда Экология вазирлиги ҳузуридаги Экологик экспертиза маркази масъуллари ва ОАВ вакиллари иштирокида матбуот анжумани ташкил этилди.
Унда сўз олган марказ директори Ғайратжон Муҳаммедов соҳада амалга оширилаётган ишлар ҳақида гапирган бўлса, унинг ўринбосари Адҳам Қурбонов ўтган йили ўзбекистонликлар томонидан содир этилган экологик ҳуқуқбузарликлар сонига аниқлик киритди.
2023 йилда 40 мингга яқин экологик ҳуқуқбузарликлар ҳолати аниқланиб, уларга нисбатан 32,7 миллиард сўмлик жарима ва 13 миллиард сўмлик табиатга етказилган зарарни ундириш ишлари олиб борилди, — дейди Адҳам Қурбонов.
Масъулнинг билдиришича, ўтган йили мутахассислар томонидан 86 мингга яқин профилактик тадбирлар ўтказилган.
Тадбирлар давомида 23 мингдан ортиқ тадбиркорлик ва хўжалик юритувчи субъектларида хатловлар ўтказилди. Унда 450 та субъектга берилган экологик воситаларнинг муддати ўтгани сабабли 3 миллиардга яқин қўшимча компенсация тўловлари ҳисобланди. 179 та корхона фаолиятини тўхтатиш бўйича даъволар қўзғатилиб, айни кунгача 39 тасининг фаолияти тўхтатилди. 16883 та маҳаллий аҳамиятга эга бўлган ва турли тоифадаги объектлар экологик экспертизага мувофиқлаштирилди, — дейди масъул.
Изоҳ (0)