Шавкат Мирзиёев Қозоғистон президенти Қосим-Жўмарт Тўқаевнинг таклифига биноан 29 март куни олий даражадаги норасмий учрашув ўтказиш учун амалий ташриф билан Олмаота шаҳрида бўлади.
Президент матбуот хизматининг хабар қилишича, икки мамлакат делегациялари иштирокида Ўзбекистон—Қозоғистон яхши қўшничилик, стратегик шериклик ва иттифоқчилик муносабатларини изчил мустаҳкамлаш масалалари ҳамда халқаро ва минтақавий аҳамиятга молик долзарб масалалар кўриб чиқилади.
Савдо, саноат кооперацияси, транспорт ва логистика, энергетика, қишлоқ ва сув хўжалиги соҳаларида амалий ҳамкорликни кенгайтириш ҳамда фаол ҳудудлараро алоқалар ва маданий-гуманитар алмашинувни давом эттириш эътибор марказида бўлади.
2024 йилнинг апрель ойи бошида Ўзбекистон ва Қозоғистон етакчиларининг шундай икки томонлама учрашуви Хива шаҳрида бўлиб ўтган эди.
Қосим-Жўмарт Тўқаев Урганч халқаро аэропортида миллий қўшиқ ва рақслар билан тантанали кутиб олинганди. Ташриф давомида икки давлат етакчилари музокаралар ўтказиб, қадимги Хива шаҳрининг тарихий обидаларини зиёрат қилганди.
Изоҳ (0)