Сурхондарё вилоятининг Олтинсой туманида банк бошқарувчиси хизмат автомобилида ЙТҲга учради. Бу ҳақда тармоқларда тарқалган хабарни “Агробанк” АТБ ахборот хизмати тасдиқлади.
Банк ахборот хизматининг маълумот беришича, ЙТҲ 2024 йилнинг 18 апрель куни тунги соат 23:00 ларда содир бўлган.
Аниқланишича, банкнинг Олтинсой филиали бошқарувчиси А.Й. филиалга тегишли бўлган давлат рақами белгиси 75 747 ЗАА оқ рангли Chevrolet Onix автомобилини бошқариб кетаётганида йўл-транспорт ҳодисасига учраган. ИИВ Йўл ҳаракати хавфсизлиги хизматининг сўровномасига асосан, Олтинсой туман тиббиёт бирлашмаси шифокор наркологи томонидан наркологик экспертиза ўтказилиб, хулосада мастлик ҳолати аниқланмагани қайд этилган, — дейилади банк ахборот хизмати хабарида.
Билдирилишича, ҳозирда мазкур йўл-транспорт ҳодисаси юзасидан ЙҲХ ва ички ишлар тергов органи томонидан дастлабки суриштирув ишлари олиб борилмоқда. Суриштирув натижалари юзасидан қўшимча маълумот берилади.
Воқеа ҳақида “Дарё”га маълумот берган манбанинг айтишича, банк бошқарувчисининг хизмат автомобилида ЙТҲга учраши иккинчи ҳолат ҳисобланди.
Бу раҳбарга чора кўрадиган одамнинг ўзи йўқ. Олдин ҳам у Nexia-3 хизмат автомобилини уриб олганди. Ўша иш ҳам босди-босди бўлиб кетганди. Бу ҳам яширилмоқда, — деганди таҳририятда воқеа жойидан видео юборган манба.
ЙТҲ ҳақида гапирган манбага кўра, банк бошқарувчиси маст ҳолда рулга ўтирган ва автомобиль бошқаруви пайтида ухлаб қолган. Шунингдек, воқеа 23:00 да эмас, тунги 01:00 дан кейин содир бўлган.
Таҳририятга юборилган видеода, воқеа жойига бориб автомобиль ҳолатини кўрганлар машина аянчли ҳолга тушганини, уни таъмирлаш ишларига тахминан 5-7 минг доллар харажат қилинишини айтган.
Ўзбекистонда раҳбарларнинг хизмат автомобиллари билан боғлиқ ЙТҲлар учраб туради.
- Қашқадарёда Косон ва Яккабоғ тумани ҳокимларининг Саптива русумли хизмат автомобилларининг ЙТҲга учраши тармоқ фойдаланувчиларнинг кўплаб муҳокамасига сабаб бўлганди.
- Косон ҳокимининг хизмат автомобили билан боғлиқ ЙТҲ бир инсон ўлимига ҳам сабабчи бўлганди.
- Наманган вилояти ҳокимининг хизмат автомобили ва Маданият вазири Озодбек Назарбековнинг хизмат автомобиллари билан боғлиқ ЙТҲлар ҳам жамоатчиликка ошкор бўлган.
Изоҳ (0)