Surxondaryo viloyatining Oltinsoy tumanida bank boshqaruvchisi xizmat avtomobilida YTHga uchradi. Bu haqda tarmoqlarda tarqalgan xabarni “Agrobank” ATB axborot xizmati tasdiqladi.
Bank axborot xizmatining ma’lumot berishicha, YTH 2024-yilning 18-aprel kuni tungi soat 23:00 larda sodir bo‘lgan.
Aniqlanishicha, bankning Oltinsoy filiali boshqaruvchisi A.Y. filialga tegishli bo‘lgan davlat raqami belgisi 75 747 ZAA oq rangli Chevrolet Onix avtomobilini boshqarib ketayotganida yo‘l-transport hodisasiga uchragan. IIV Yo‘l harakati xavfsizligi xizmatining so‘rovnomasiga asosan, Oltinsoy tuman tibbiyot birlashmasi shifokor narkologi tomonidan narkologik ekspertiza o‘tkazilib, xulosada mastlik holati aniqlanmagani qayd etilgan, — deyiladi bank axborot xizmati xabarida.
Bildirilishicha, hozirda mazkur yo‘l-transport hodisasi yuzasidan YHX va ichki ishlar tergov organi tomonidan dastlabki surishtiruv ishlari olib borilmoqda. Surishtiruv natijalari yuzasidan qo‘shimcha ma’lumot beriladi.
Voqea haqida “Daryo”ga ma’lumot bergan manbaning aytishicha, bank boshqaruvchisining xizmat avtomobilida YTHga uchrashi ikkinchi holat hisoblandi.
Bu rahbarga chora ko‘radigan odamning o‘zi yo‘q. Oldin ham u Nexia-3 xizmat avtomobilini urib olgandi. O‘sha ish ham bosdi-bosdi bo‘lib ketgandi. Bu ham yashirilmoqda, — degandi tahririyatda voqea joyidan video yuborgan manba.
YTH haqida gapirgan manbaga ko‘ra, bank boshqaruvchisi mast holda rulga o‘tirgan va avtomobil boshqaruvi paytida uxlab qolgan. Shuningdek, voqea 23:00 da emas, tungi 01:00 dan keyin sodir bo‘lgan.
Tahririyatga yuborilgan videoda, voqea joyiga borib avtomobil holatini ko‘rganlar mashina ayanchli holga tushganini, uni ta’mirlash ishlariga taxminan 5-7 ming dollar xarajat qilinishini aytgan.
O‘zbekistonda rahbarlarning xizmat avtomobillari bilan bog‘liq YTHlar uchrab turadi.
- Qashqadaryoda Koson va Yakkabog‘ tumani hokimlarining Сaptiva rusumli xizmat avtomobillarining YTHga uchrashi tarmoq foydalanuvchilarning ko‘plab muhokamasiga sabab bo‘lgandi.
- Koson hokimining xizmat avtomobili bilan bog‘liq YTH bir inson o‘limiga ham sababchi bo‘lgandi.
- Namangan viloyati hokimining xizmat avtomobili va Madaniyat vaziri Ozodbek Nazarbekovning xizmat avtomobillari bilan bog‘liq YTHlar ham jamoatchilikka oshkor bo‘lgan.
Izoh (0)