Жорий йилнинг 7 февраль куни ФИФА “Бунёдкор” собиқ футболчилари Ривалдо ва Денилсон шикоятлари бўйича қайта иш очган бўлиб, орадан 15 кун ўтиб, клуб футболчилар олдидаги қарздорлик мажбуриятини бажариши лозимлиги тўғрисида қарор чиқарганди.
ОФК лицензиялаш талабидан келиб чиқиб, профессионал футбол клуби йилнинг 31 март санасига қадар қарздорлик билан боғлиқ масалаларни ҳал этиши лозим. Олиб борилган музокаралар натижасида томонлар 30 март куни келишувга эришди. Натижада “Бунёдкор” лицензиялаш платформасига лозим ҳужжатларни юклашга улгурди.
ФИФА қарорига кўра, “Бунёдкор” Ривалдо ва Денилсон олдидаги қарздорликни шу йилнинг 7 апрель санасига қадар бартараф этиши керак эди.
“Қалдирғочлар” ФИФА низоларни ҳал қилиш палатаси ва CAS қарорига кўра, Ривалдога: 2 489 947 евро – клуб томонидан бразилиялик футболчига тўланмаган мукофот пули ҳамда йиллик 5 фоиз устама; 5 664 000 евро – шартнома бекор қилиниши сабабли товон пули ҳамда йиллик 5 фоиз бонус. 10 минг Швейцария франки – арбитраж суди жараёнида харажатлар учун товон пули тўлаб бериши керак эди.
Денилсонга эса 700 000 доллар – клуб томонидан бразилиялик футболчига тўланмаган мукофот пули ҳамда йиллик 5 фоиз устама; 400 000 доллар – келишув шартлари бузилганлиги учун товон пули ҳамда йиллик 5 фоиз бонус. 10 минг Швейцария франки – арбитраж суди жараёнида харажатлар учун товон пули тўлаши белгиланганди.
Янги келишувга кўра тўланиши лозим бўлган суммалар сезиларли кўринишда камайтирилди.
Қўшимчасига, келишилган сумма Денилсонга 2026 йилгача уч қисмга бўлиб тўланадиган бўлди. Ривалдо билан ҳисоб-китоб эса 2028 йилга қадар ҳар йили бир мартадан амалга ошириладиган бўлди.
Эслатиб ўтамиз, Ривалдо 2008 йилдан 2010 йилга қадар “Бунёдкор” шарафини ҳимоя қилган. Денилсон эса 2010 йилда клуб сафида тўп сурган.
Изоҳ (0)