Голливуд фильмларидан рухсатсиз фойдаланган фуқаро жаримага тортилди, деб хабар бермоқда Адлия вазирлиги.
Унга кўра, Адлия вазирлиги томонидан ҳуқуқ эгасининг мурожаатини кўриб чиқиш давомида фуқаро Т.Б. томонидан “Вонка” ва “Аквамен и потерянное царство” фильмларининг овози улар кинотеатрда намойиш этилаётган вақтда уяли телефонга ёзиб олингани маълум бўлди.
Натижада ҳуқуқ эгасининг рухсатисиз ҳамда тегишли тартибда шартнома тузмасдан фильмнинг овози ва видеотасвири бирлаштирилиб, интернет орқали барчанинг эътиборига етказилгани аниқланди. Ҳолат юзасидан фуқаро Т.Б.га нисбатан Маъмурий жавобгарлик тўғрисидаги кодексининг 177-1-моддаси билан маъмурий ҳуқуқбузарлик тўғрисидаги баённома расмийлаштирилиб, жавобгарлик масаласини кўриб чиқишлик учун тегишли судга юборилди.
Суд қарорига кўра, ҳуқуқбузарга нисбатан Маъмурий жавобгарлик тўғрисидаги кодексининг 177-1-моддаси биринчи қисмида назарда тутилган ҳуқуқбузарлик содир этганлиги учун жарима жазоси тайинланди.
Маълумот учун, “Муаллифлик ҳуқуқи ва турдош ҳуқуқлар тўғрисида”ги қонун 65-моддасига мувофиқ ҳуқуқ эгаси зарарлар етказилиши фактидан қатъий назар, ҳуқуқбузардан базавий ҳисоблаш миқдорининг 20 бараваридан 1000 бараваригача товон пули талаб қилиш ҳуқуқига эга.
Изоҳ (0)