Ўзбекистонда алимент тўловлари ошади

Ўзбекистонда алимент тўловлари ошади, деб хабар бермоқда ЎзА ахборот хизмати. 

Мажбурий ижро бюросининг бўлим катта инспектори Ҳакимжон Икромовга кўра, алимент ундируви 2024 йил 1 сентябрдан бошлаб, қарздорнинг нафақасига қаратилган ижро ҳужжатлари бўйича тўланадиган алимент миқдори 15 фоизга, 1 октябрдан бошлаб, қарздор педагог ходимларнинг иш ҳақига қаратилган ижро ҳужжатлари бўйича тўланадиган алимент миқдори 15 фоизга, хусусий сектор ва бюджет ташкилотларида фаолият юритувчи қарздорларнинг иш ҳақига қаратилган ижро ҳужжатлари бўйича тўланадиган алимент миқдори эса 10 фоизга ошади.

Бундан ташқари, 2024 йил 1 октябрдан ишсиз алимент тўловчилар томонидан тўланадиган алимент миқдори ҳам ўртача 10 фоизга ошади.

Маълумот учун: агар алимент тўловчи шахс ишламайдиган бўлса ёки унинг иш ҳақи ва даромадини тасдиқловчи ҳужжатлар тақдим қилинмаган бўлса, алимент қарзи ундирилаётган вақтда Ўзбекистондаги ўртача ойлик иш ҳақи миқдори бўйича ҳисоблаб чиқилади.

Президент фармони билан Ўзбекистонда 2024 йил 1 сентябрдан пенсия ва нафақалар миқдори 15 фоиз оширилиши белгиланган. 1 октябрдан давлат ташкилотлари ходимлари, хусусан, педагоглар (олий таълимдан ташқари) ва шифокорлар иш ҳақи 15 фоиз, бошқа ходимлар ойлиги 10 фоиз кўтарилади. Иқтисодиёт ва молия вазирлиги департамент директори ўринбосари Шоҳрух Ишонқулов иш ҳақи, пенсия ва нафақалар қонунда белгиланган миқдорда оширилганини айтган.