Жорий йилги сайловларда Ўзбекистон экологик партияси илгари сураётган муҳим ташаббуслардан бири бу 2030 йилга қадар пестицидлардан фойдаланиш ҳажмини 50 % камайтиришдан иборат.
Мазкур таклиф аҳолимизнинг соғлом турмуш тарзини янада яхшилаш, озиқ-овқат маҳсулотларининг сифатини оширишда табиий қишлоқ хўжалиги маҳсулотларини етиштириш учун муҳим саналади.
Пестицидлар зараркунандаларни йўқ қилиш учун ишлатиладиган кимёвий модда бўлиб, афсуски ҳозирги кунда экинларни зараркунандалардан ҳимоя қилишда улардан фаол равишда фойдаланиб келинади. Булар бутун дунёда қўлланиладиган экинларни ҳимоя қилишнинг асосий шаклидир. Пестицидлар зараркунандаларга қарши курашиш ва яхши ҳосил олишда муҳим аҳамиятга эга бўлса-да, уларнинг салбий оқибатларини эътибордан четда қолдириб бўлмайди.
Айниқса, пестицидлардан фойдаланишда охирги ишлов билан ҳосилни териб олиш орасидаги муддат жуда муҳимдир. Бу билан бирор бир мева ёки бошқа маҳсулотнинг таркибида қоладиган пестицид миқдори бошқарилади. Баъзи пестицидларни ҳосил териб олишдан 1 ой олдин ишлатишга рухсат бўлса, баъзиларини эса 10 кун олдин ишлатиш мумкин. Масалан, етиштирилаётган помидорни териб олишдан камида 1 ой олдин ишлатишдан тўхтатиш керак бўлган пестицидни бугун ишлатиб кейин 5 ёки 10 кундан кейин бу помидор териб бозорга олиб чиқилса инсон саломатлигига салбий таъсир кўрсатиши тайин. Ёки гектарига 1 килограмм ишлатиш керак бўлган пестицидни яхшироқ натижа оламан деб, кўр-кўрона 2 килограммдан ишлатиш ҳам қонунга хилофдир. Чунки бундай ҳолатларда етиштирилаётган маҳсулот таркибида инсон саломатлиги учун жиддий хавф туғдириши мумкин бўлган пестицид қолдиқлари қолиб кетган бўлади.
Пестицидлар одамлар ва атроф-муҳитни хавф остида қолдириши, саратон ва неврологик касалликларни келтириб чиқариши, сув манбалари ҳамда озиқ-овқат маҳсулотларини ифлосланишига олиб келиши мумкин.
Шу жиҳатдан Ўзбекистон экологик партияси аҳоли саломатлигини ҳимоялаш ва соғлом ҳаёт кечиришини таъминлаш, тупроқ унумдорлигини янада яхшилаш мақсадида қишлоқ хўжалиги маҳсулотлари етиштиришда кимёвий кураш билан биргаликда биологик кураш усулларидан кенг фойдаланиш зарур эканлиги ва бу билан пестицидларнинг зарарли моддалари тупроқларга, сув манбалари ва атмосферага ўтиб кетишини олдини олиш тарафдоридир.
Изоҳ (0)