Марказий банк январь ойи учун аҳоли ва тадбиркорлик субъектлари томонидан сезилган инфляция даражаси бўйича маълумот берди.
Ўтказилган сўровлар натижасига кўра, январь ойида аҳоли томонидан сезилган инфляция даражаси ўтган ойги даражасида сақланиб қолиб, 14,7 фоизни ташкил этди. Келгусида нархларга оширувчи босим кўрсатиши мумкин бўлган асосий омиллар сифатида коммунал хизматлар қимматлашиши, валюта курси ўзгариши, транспорт харажатларининг ошиши ҳамда нархларнинг сунъий оширилишини таъкидлаган аҳоли респондентлари улуши камайган.
Шунингдек, аҳоли томонидан юқори сезилган инфляция даражаси давлат ташкилоти ва тиббиёт соҳалари вакиллари томонидан билдирилган бўлса, нисбатан паст сезилган инфляция маиший хизмат соҳаси вакиллари томонидан қайд этилди.
Тадбиркорлар юқори инфляцион кутилмалари таълим соҳасида фаолият олиб борадиган корхоналар томонидан қайд этилган бўлса, келгусида нархлар шаклланиши бўйича нисбатан паст кутилмалар ахборот технологиялари соҳасида кузатилган.
Аҳоли томонидан инфляцион кутилмаларнинг юқори кўрсаткичи Сирдарё вилоятида кузатилган, нисбатан паст инфляцион кутилмалар Навоий вилоятида яшовчи аҳоли томонидан қайд этилган. Даромадсиз ҳамда даромадлари 5 миллион сўмдан юқори бўлган аҳолининг сезилган инфляция даражаси нисбатан юқори шаклланди.
Марказий банк 2024 йил якунида Ўзбекистонда инфляция даражаси дастлаб 9 фоиз, кейин 9,5 фоиз бўлишини прогноз қилганди. Бироқ йил сўнгида инфляция 9,8 фоиз шаклланди.
2019 йилдаги президент фармонида Марказий банкка инфляцияни 2021 йилда 10 фоизга пасайтириш, 2023 йилда эса 5 фоиз даражадаги доимий инфляцион мақсадни (таргет) ўрнатиш топширилган. Бироқ бу мақсадга ҳалигача етилгани йўқ.
Бугунгача инфляция таргетлари бир неча марта ўзгартирилди. Хусусан, 2020 йилда 5 фоизлик таргет кўрсаткичига эришиш муддати 2023 йилга, 2022 йилдаги мақсад 2024 йил охирига, ўтган йили эса бу муддат 2025 йил иккинчи ярмига кўчирилган.
Сўнгги прогнозларга кўра, 5 фоизлик инфляция даражасига 2026 йилнинг иккинчи ярмида эришиш кутилмоқда.
Изоҳ (0)