O‘zbekistonda yanvar oyida aholi tomonidan sezilgan inflyatsiya darajasi ma’lum qilindi

Markaziy bank yanvar oyi uchun aholi va tadbirkorlik subyektlari tomonidan sezilgan inflyatsiya darajasi bo‘yicha maʼlumot berdi. 

O‘tkazilgan so‘rovlar natijasiga ko‘ra, yanvar oyida aholi tomonidan sezilgan inflyatsiya darajasi o‘tgan oygi darajasida saqlanib qolib, 14,7 foizni tashkil etdi. Kelgusida narxlarga oshiruvchi bosim ko‘rsatishi mumkin bo‘lgan asosiy omillar sifatida kommunal xizmatlar qimmatlashishi, valyuta kursi o‘zgarishi, transport xarajatlarining oshishi hamda narxlarning sunʼiy oshirilishini taʼkidlagan aholi respondentlari ulushi kamaygan.

Shuningdek, aholi tomonidan yuqori sezilgan inflyatsiya darajasi davlat tashkiloti va tibbiyot sohalari vakillari tomonidan bildirilgan bo‘lsa, nisbatan past sezilgan inflyatsiya maishiy xizmat sohasi vakillari tomonidan qayd etildi.

Tadbirkorlar yuqori inflyatsion kutilmalari ta’lim sohasida faoliyat olib boradigan korxonalar tomonidan qayd etilgan bo‘lsa, kelgusida narxlar shakllanishi bo‘yicha nisbatan past kutilmalar axborot texnologiyalari sohasida kuzatilgan.

Aholi tomonidan inflyatsion kutilmalarning yuqori ko‘rsatkichi Sirdaryo viloyatida kuzatilgan, nisbatan past inflyatsion kutilmalar Navoiy viloyatida yashovchi aholi tomonidan qayd etilgan. Daromadsiz hamda daromadlari 5 million so‘mdan yuqori bo‘lgan aholining sezilgan inflyatsiya darajasi nisbatan yuqori shakllandi.

Markaziy bank 2024-yil yakunida O‘zbekistonda inflyatsiya darajasi dastlab 9 foiz, keyin 9,5 foiz bo‘lishini prognoz qilgandi. Biroq yil so‘ngida inflyatsiya 9,8 foiz shakllandi.

2019-yildagi prezident farmonida Markaziy bankka inflyatsiyani 2021-yilda 10 foizga pasaytirish, 2023-yilda esa 5 foiz darajadagi doimiy inflyatsion maqsadni (target) o‘rnatish topshirilgan. Biroq bu maqsadga haligacha yetilgani yo‘q.

Bugungacha inflyatsiya targetlari bir necha marta o‘zgartirildi. Xususan, 2020-yilda 5 foizlik target ko‘rsatkichiga erishish muddati 2023-yilga, 2022-yildagi maqsad 2024-yil oxiriga, o‘tgan yili esa bu muddat 2025-yil ikkinchi yarmiga ko‘chirilgan.

So‘nggi prognozlarga ko‘ra, 5 foizlik inflyatsiya darajasiga 2026-yilning ikkinchi yarmida erishish kutilmoqda.