Фаластиннинг ҲАМАС ҳаракати гаровга олинган барча исроилликларни бир вақтнинг ўзида озод қилишга тайёрлигини билдирди, бироқ шарт қўйди. Бу ҳақда Al Jazeera хабар берди.
ҲАМАС Ғазо секторида ўт очишни тўхтатиш бўйича келишувнинг иккинчи босқичи бўйича музокаралар чоғида ўз позицияларини баён қилди.
Биз иккинчи босқичга тайёрмиз. Бу босқичда гаровдагилар бир вақтда озод этилади. Бу жараён ўт очишни доимий тўхтатиш ва Ғазо секторидан қўшинларни тўлиқ олиб чиқиш доирасида амалга оширилади, деди ҲАМАС матбуот котиби Ҳазем Қосим.
ҲАМАСнинг янги ташаббуси АҚШ президенти Дональд Трамп Ғазода сақланаётган исроиллик гаровдагиларни ҳар ҳафта босқичма-босқич озод қилишга қарши чиққанидан кейин эълон қилинди. ҲАМАСга барча гаровга олинганларни озод қилиш талаби билан уларнинг оила аъзолари ҳам дарҳол мурожаат қилишди.
15 январь куни Исроил ва ҲАМАС Ғазода гаровга олинганларни озод қилиш ва анклавда ўт очишни тўхтатиш режимини жорий этиш бўйича келишувга эришди. Учта босқични ўз ичига олган келишув 19 январь куни кучга кирди.
Биринчи босқични амалга ошириш 42 кун давом этди, бу вақт ичида ҲАМАС камида 33 нафар исроиллик гаровга олинганларни Исроил қамоқхоналарида сақланаётган фаластинлик маҳбуслар эвазига озод қилиши керак эди. Гаровга олинган 19 киши аллақачон Исроилга қайтарилган. Келишувнинг иккинчи ва учинчи босқичлари бўйича музокаралар кетмоқда.
Изоҳ (0)