Тошкент вилоятининг Янгийўл туманида фуқароларга тажриба тарзида ижтимоий карта берила бошланди. Бу ҳақда вилоят ҳокимлиги матбуот хизмати хабар берди.
Ўзбекистонда ижтимоий карта тизими жорий этилиши ҳақида 2024 йил июлида Шавкат Мирзиёевга тақдим қилинган ижтимоий ҳимоя соҳасидаги қўшимча чора-тадбирлар тақдимотида маълум қилинганди. Бу тартиб дастлаб Тошкент шаҳри ва Янгийўл туманида, кейинги йилдан бошқа ҳудудларда жорий этилиши белгиланганди.
Президент 2024 йил декабрида ўтказилган видеоселектор йиғилишида ҳозирги кунда 65 турдаги ижтимоий хизмат ва ёрдам олиш учун фуқароларимиз туғилганлик, ногиронлик тўғрисида, пенсия, талабалик гувоҳномаси, банк картаси каби 10 дан ортиқ ҳужжатни кўтариб юришга мажбурлигини, бундай оворагарчиликка чек қўйиш вақти келганини таъкидлаганди.
Ижтимоий карта бир вақтнинг ўзида ҳам тўлов воситаси, ҳам эҳтиёжманд тоифага мансублик тасдиғи ҳисобланади. Бу орқали қоғоз шаклидаги ҳужжатлар бекор қилиниб, вақт ва маблағ тежалади. 72 турдаги ижтимоий хизматлар, 76 турдаги ёрдамлар ва 200 га яқин имтиёзлар ягона электрон тизимга умумлаштирилади. Қоғоз шаклидаги ҳужжатлар бекор қилиниб, вақт ва маблағ тежалади.
Ижтимоий карта билан автобус ва метрода бепул юриш, электр, газ ва ўқиш харажатига компенсация олиш мумкин бўлади, нафақа ва ёрдам пуллари ҳам шу картага тушади.
Айни вақтда Янгийўл туманида фуқаролар ижтимоий картадан фойдаланмоқда. Республиканинг қолган барча ҳудудларида ҳам шу йилнинг 1 июлидан бошлаб, мазкур лойиҳа татбиқ қилинади.
Ижтимоий картани бериш ва ундан фойдаланиш учун аризалар Ягона интерактив давлат хизматлари портали, “Ижтимоий карта” мобил иловаси, “Инсон” ижтимоий хизмат марказлари орқали топшириши мумкин.
Изоҳ (0)