“Тадбиркорликни ривожлантириш компанияси” 2025 йилнинг 1 январь ҳолати бўйича давлат томонидан тадбиркорлик субъектлари фаолиятини ривожлантириш бўйича амалга оширилган ишлар ҳисоботини “Дарё”га тақдим этди.
Унга кўра, 2018—2024 йиллар мобайнида компания тадбиркорликни ривожлантириш ва қўллаб-қувватлаш мақсадида 46,7 минг нафар бизнес эгасининг 51 мингта лойиҳасига жами 17,7 триллион сўм миқдорида молиявий ёрдам кўрсатди. Бунинг натижасида мамлакатда 382,8 мингга яқин янги иш ўринлари яратилди.
“Бу шунчаки рақам эмас, балки қарийб 383 минг оиланинг қора қозони қайнаётганидан, уларнинг иқтисодий ҳолати кун сайин яхшиланиб бораётганидан далолатдир”, дейилади ҳисоботда.
Компания 2024 йилда янги молиявий инструментлар жорий этиш орқали хизматлар сонини 2 тадан 24 тагача оширишга эришди. Ушбу хизматлар тадбиркорларга бизнесларини кенгайтириш ва барқарор ривожлантиришда кенг имкониятлар яратди.
Тадбиркорлар билан ўзаро самарали ҳамкорлик натижасида компания:
- 13,6 мингта лойиҳа учун ажратилган 10,5 триллион сўм кредитга кафил бўлди;
- 33,5 мингта лойиҳа доирасида 6,6 триллион сўмлик компенсация тўлади;
- 4 та лойиҳага 5,6 миллиард сўм улуш киритди;
- 10 та лойиҳага 57,9 миллиард сўм хизматлар ипотекаси берди;
- 2 та лойиҳага 17 миллиард сўм қарз тақдим этди;
- 3 657 та лойиҳага ажратилган 334 миллиард сўмлик микрокредитларни қайта молиялаштирди;
- 124 та лойиҳага 156 миллиард сўм миқдорида ресурс ажратди.
Бугунги кунда компания хизматлар ипотекаси бўйича 238,2 миллиард сўмлик ва қарз молиявий ёрдами бўйича 203,4 миллиард сўмлик лойиҳалар устида иш олиб бормоқда.
Ҳисобот даврида компания молиявий кўмагидан Хоразм (2,1 триллион сўм), Тошкент вилояти (1,7 триллион сўм), Бухоро (1,6 триллион сўм) ва Тошкент шаҳри (1,6 триллион сўм) тадбиркорлари энг кўп фойдаланган.
Шунингдек, янги иш ўринлари яратиш бўйича Андижон (56 991 та), Фарғона (35 466 та), Хоразм (32 916 та), Самарқанд (49 491 та) ҳамда Наманган (27 402 та) вилоятлари етакчилик қилмоқда.
Соҳалар кесимида таҳлил қилинса, ёрдамларнинг
- 9,3 триллион сўм қисми қишлоқ хўжалиги,
- 4,4 триллион сўми саноат,
- 3,7 триллион сўми хизмат кўрсатишга тўғри келади.
Қолган 336 миллиард қисми эса гаровсиз кредитларни қайта молиялаштиришга тегишли.
Ҳисоботда таъкидланишича, компания хизматларидан фойдаланаётган аёл тадбиркорлар сони изчил ошиб бормоқда. Бугунги кунда уларнинг сони 6 мингга яқинлашган.
“Тадбиркорликни ривожлантириш компанияси” ҳақида
Тадбиркорлик фаолиятини қўллаб-қувватлаш давлат жамғармаси президент фармони билан 2023 йилда “Тадбиркорликни ривожлантириш компанияси” сифатида қайта ташкил этилганди. Натижада компания томонидан бизнесни қўллаб-қувватлаш бўйича янги инструментлар жорий этилмоқда ва амалдаги ёрдам турлари кенгайтирилмоқда.
Фармон қабул қилингунгача кафиллик фақат кичик тадбиркорларга бериларди. Ҳозирда ўрта бизнес ҳам бундай кафиллик олиши мумкин. Илгари кафиллик фақат миллий валютадаги кредитларга берилган бўлса, эндилик тадбиркорлар хорижий валютадаги кредитлари учун ҳам кафиллик олиши мумкин.
Шавкат Мирзиёев тадбиркорликни ҳар томонлама қўллаб-қувватлаш бўйича 2024 йил якунлари ва 2025 йилга асосий режалар юзасидан видеоселектор йиғилишида “Тадбиркорларимиз қанча бой бўлса, халқимиз шунча фаровон яшайди, давлатимиз шунча қудратли бўлади. Тадбиркорнинг ютуғи – бу бутун халқимизнинг ютуғи”, деб айтганди.
Изоҳ (1)
Предприниматели в Узбекистане действительно вдохновляют! За последние 5 лет они создали множество рабочих мест, что значительно способствует экономическому развитию страны и улучшению жизненного уровня людей. Это свидетельствует о росте предпринимательской активности и поддержке новых идей. Молодцы!