“Tadbirkorlikni rivojlantirish kompaniyasi” 2025-yilning 1-yanvar holati bo‘yicha davlat tomonidan tadbirkorlik subyektlari faoliyatini rivojlantirish bo‘yicha amalga oshirilgan ishlar hisobotini “Daryo”ga taqdim etdi.
Unga ko‘ra, 2018—2024-yillar mobaynida kompaniya tadbirkorlikni rivojlantirish va qo‘llab-quvvatlash maqsadida 46,7 ming nafar biznes egasining 51 mingta loyihasiga jami 17,7 trillion so‘m miqdorida moliyaviy yordam ko‘rsatdi. Buning natijasida mamlakatda 382,8 mingga yaqin yangi ish o‘rinlari yaratildi.
“Bu shunchaki raqam emas, balki qariyb 383 ming oilaning qora qozoni qaynayotganidan, ularning iqtisodiy holati kun sayin yaxshilanib borayotganidan dalolatdir”, deyiladi hisobotda.
Kompaniya 2024-yilda yangi moliyaviy instrumentlar joriy etish orqali xizmatlar sonini 2 tadan 24 tagacha oshirishga erishdi. Ushbu xizmatlar tadbirkorlarga bizneslarini kengaytirish va barqaror rivojlantirishda keng imkoniyatlar yaratdi.
Tadbirkorlar bilan o‘zaro samarali hamkorlik natijasida kompaniya:
- 13,6 mingta loyiha uchun ajratilgan 10,5 trillion so‘m kreditga kafil bo‘ldi;
- 33,5 mingta loyiha doirasida 6,6 trillion so‘mlik kompensatsiya to‘ladi;
- 4 ta loyihaga 5,6 milliard so‘m ulush kiritdi;
- 10 ta loyihaga 57,9 milliard so‘m xizmatlar ipotekasi berdi;
- 2 ta loyihaga 17 milliard so‘m qarz taqdim etdi;
- 3 657 ta loyihaga ajratilgan 334 milliard so‘mlik mikrokreditlarni qayta moliyalashtirdi;
- 124 ta loyihaga 156 milliard so‘m miqdorida resurs ajratdi.
Bugungi kunda kompaniya xizmatlar ipotekasi bo‘yicha 238,2 milliard so‘mlik va qarz moliyaviy yordami bo‘yicha 203,4 milliard so‘mlik loyihalar ustida ish olib bormoqda.
Hisobot davrida kompaniya moliyaviy ko‘magidan Xorazm (2,1 trillion so‘m), Toshkent viloyati (1,7 trillion so‘m), Buxoro (1,6 trillion so‘m) va Toshkent shahri (1,6 trillion so‘m) tadbirkorlari eng ko‘p foydalangan.
Shuningdek, yangi ish o‘rinlari yaratish bo‘yicha Andijon (56 991 ta), Farg‘ona (35 466 ta), Xorazm (32 916 ta), Samarqand (49 491 ta) hamda Namangan (27 402 ta) viloyatlari yetakchilik qilmoqda.
Sohalar kesimida tahlil qilinsa, yordamlarning
- 9,3 trillion so‘m qismi qishloq xo‘jaligi,
- 4,4 trillion so‘mi sanoat,
- 3,7 trillion so‘mi xizmat ko‘rsatishga to‘g‘ri keladi.
Qolgan 336 milliard qismi esa garovsiz kreditlarni qayta moliyalashtirishga tegishli.
Hisobotda ta’kidlanishicha, kompaniya xizmatlaridan foydalanayotgan ayol tadbirkorlar soni izchil oshib bormoqda. Bugungi kunda ularning soni 6 mingga yaqinlashgan.
“Tadbirkorlikni rivojlantirish kompaniyasi” haqida
Tadbirkorlik faoliyatini qo‘llab-quvvatlash davlat jamg‘armasi prezident farmoni bilan 2023-yilda “Tadbirkorlikni rivojlantirish kompaniyasi” sifatida qayta tashkil etilgandi. Natijada kompaniya tomonidan biznesni qo‘llab-quvvatlash bo‘yicha yangi instrumentlar joriy etilmoqda va amaldagi yordam turlari kengaytirilmoqda.
Farmon qabul qilingungacha kafillik faqat kichik tadbirkorlarga berilardi. Hozirda o‘rta biznes ham bunday kafillik olishi mumkin. Ilgari kafillik faqat milliy valyutadagi kreditlarga berilgan bo‘lsa, endilik tadbirkorlar xorijiy valyutadagi kreditlari uchun ham kafillik olishi mumkin.
Shavkat Mirziyoyev tadbirkorlikni har tomonlama qo‘llab-quvvatlash bo‘yicha 2024-yil yakunlari va 2025-yilga asosiy rejalar yuzasidan videoselektor yig‘ilishida “Tadbirkorlarimiz qancha boy bo‘lsa, xalqimiz shuncha farovon yashaydi, davlatimiz shuncha qudratli bo‘ladi. Tadbirkorning yutug‘i – bu butun xalqimizning yutug‘i”, deb aytgandi.
Izoh (1)
Предприниматели в Узбекистане действительно вдохновляют! За последние 5 лет они создали множество рабочих мест, что значительно способствует экономическому развитию страны и улучшению жизненного уровня людей. Это свидетельствует о росте предпринимательской активности и поддержке новых идей. Молодцы!