Тошкентда “Саидазиз медгородок” лақаби билан танилган Саидазиз Саидалиев жисмонан бақувват бир нечта шахсни ўз атрофига тўплаб, ўлдириш ёки зўрлик ишлатиш билан қўрқитиш каби жиноятларни содир қилганликда айбланмоқда.
1987 йил Тошкент шаҳрида туғилган Саидазиз Саидалиев қарздорлик ва бошқа муаммолари бўлган шахслар масаласини қонунни четлаб ўтган ҳолда ҳал қилиб бериши эвазига моддий жиҳатдан манфаатдор бўлиб келган. Шу сабаб у фуқароларга таҳдид қилиб, пул маблағларини ноқонуний қўлга киритган.
“Адолат” ахборот тизимлари комплексининг суд мажлислари жадвалига кўра, “Саидазиз медгородок” ҳамда яна 28 кишининг суди 2024 йилнинг 11 июнь куни соат 10:00 да бошланади.
Гуруҳнинг асосий аъзоси Саидазиз Саидалиев Жиноят кодексининг 165-моддаси 3-қисми “а” ва “в” банди (товламачилик), 168-моддаси 4-қисми “а” ва “в” банди (фирибгарлик), 211-моддаси 3-қисми “а” ва “б” банди (пора бериш), 242-моддаси 1-қисми (жиноий уюшма ташкил этиш), 243-моддаси (жиноий фаолиятдан олинган даромадларни легаллаштириш), 277-моддаси 2-қисми “б” ва “в” банди (безорилик), 277-моддаси 3-қисми “а” банди (безорилик) билан айбланмоқда.
Аниқлаштирилишича, Саидазиз Саидалиев ва унинг шерикларидан жабрланганлар сони 30 нафардан ортиқ. Улар орасида тадбиркорлар ҳам бор.
“Саидазиз медгородок” ва унинг шериклари, шунингдек, айни пайтда суди давом этаётган “Бахти Ташкентский” ҳам Тошкент шаҳар ИИББ пойтахтда криминоген вазиятни яхшилаш бўйича кенг қамровли тезкор-профилактик тадбирлар ўтказган пайтда қўлга олинганди.
Изоҳ (0)