“Электр сарфи ойлик ҳисобланади” — кунига 6,6 киловаттдан кўп сарфланган ток учун қиммат нарх белгилангани рад этилди

Telegram каналларда электр энергияси учун янги жорий этилган ўсувчан ойлик тарифлар кунлик истеъмол учун алоҳида тарзда амал қилаётгани ҳақида хабар тарқалди. Унда кунлик сарфи 6,6 кВт/соатдан ошган ток учун қиммат нархда тўлов қилиниши айтилган. “Ҳудудий электр тармоқлари” АЖ мазкур хабар асоссиз эканини маълум қилди.

2024 йил 1 майдан Ўзбекистон аҳолиси учун электр энергияси ва табиий газ нархларига ойлик ижтимоий норма жорий этилди. Хусусан, бир ойда 200 кВт/соатгача сарфланган электр энергияси тўлови 450 сўмдан (1 киловаттга), ундан ошган қисмига ўсувчан тарифларда тўлов қилиниши белгиланди.

Бугун, 10 июнь куни ижтимоий тармоқларда кунлик 6,6 киловаттдан кўп фойдаланилган электр энергияси учун қиммат нархда тўлов қилишга тўғри келаётгани ҳақида хабарлар тарқалди. “Ҳудудий электр тармоқлари” АЖ бунга расмий муносабат билдирди.

Маълум қилинишича, мазкур хабар асоссиз бўлиб, ижтимоий норма ойлик кўрсаткичларга мувофиқ амал қилади.

“Бир ойда 200 киловаттгача электр энергияси ишлатган хонадон эгаси 1 киловатт соат учун 450 сўмдан тўлайди. Истеъмол мазкур кўрсаткичдан ошса, яъни 1000 киловатт соатгача ишлатилган бўлса, 200 киловатт соатгача — 450 сўм, қолган 800 киловатт соатга — 900 сўмдан тўлов қилинади. Мазкур ўсувчи тарифларни ҳисоблашда ҳамда хабарда келтирилганидек, электр энергияси сарфи кунлик истеъмол миқдорида эмас, балки истеъмолчининг бир ой давомидаги кўрсаткичи асосида ҳисобланишини маълум қиламиз”, — дейилади манбада.

Мисол келтирилишича, истеъмолчи бир ойда 300 киловаттгача электр энергияси ишлатган бўлса, хонадон эгаси 200 киловаттга 1 киловатт соат учун — 450 сўм, қолган 100 киловатт соат учун 900 сўмдан тўлайди. 2024 йил 1 июндан истеъмолчиларга фойдаланилган электр энергияси ва табиий газ бўйича ойлик маълумот “базавий меёр” ва ундан ортиқ ҳажмлар кесимида юборилади.

Ижтимоий тармоқларда тарқатилаётган “...кунига 6,6 кВтдан ортиқ ток ишлацангиз, ундан ортганига қиммат тарифда тўланади”, деган хабарлар мутлақо асоссиз эканлигини таъкидлаган ҳолда, янгилик каналлари админларидан бундай ёлғон маълумотларни тарқатмасликларини сўраб қоламиз. “Ҳудудий электр тармоқлари” АЖ мазкур тарқатилган асоссиз маълумот юзасидан тегишли тартибда ҳуқуқни муҳофаза қилиш органларига мурожаат қилишини маълум қилади, — дейилган ташкилот муносабатида.

Аввалроқ энергетика вазири Жўрабек Мирзамаҳмудов нега айнан ижтимоий норма 200 кВт/соат этиб белгиланганига изоҳ берганди.

Апрель ойида асосий истеъмолчиларнинг 73 фоизи 200 кВт/соатдан кам электр ишлатган. Қиш ойларида ҳам 66–68 фоиз абонент 200 кВт/соатгача электр ишлатган. Ҳисоб-китобларимизга кўра, 200 кВт/соат базавий эҳтиёжларни қоплашга етади, — деган вазирлик раҳбари.

Шунингдек, Энергетика вазирлиги Ўзбекистонда электр учун нархларнинг ошиши 98 фоиз истеъмолчиларга мутлақо таъсир қилмаслигини маълум қилган.