Ўзбекистонда “қонундаги ўғри — Бахти Ташкентский” мақомини олган Бахтиёр Қудратуллаев ва 36 нафар айбланувчи бўйича суд мажлиси бошлангани ҳақида хабар берилганди. Судлов ҳайъати 2024 йилнинг 10 июнь куни давом этган навбатдаги суд мажлисида жараённи ОАВда ёритишни тақиқлади. Судда журналистларнинг видео ҳамда аудиомаълумотлар олишига чек қўйилди. Бу ҳақда судда қатнашган “Дарё” журналисти хабар берди.
Журналистларга суд мажлисида видео ва аудиоёзув олиб боришни суд тақиқлади. Очиқ суд мажлиси бўлгани учун иштирок этишлари мумкин, хоҳлашса, расм чизиб ўтиришсин, — дейди бу ҳақда суд ажрими чиқарилганини айтган ЖИБ Шайхонтоҳур туман суди раиси Толибжон Обидов.
2024 йилнинг 3 июнь куни Жиноят ишлари бўйича Юнусобод туман судида ЖИБ Шайхонтоҳур туман суди раиси Толибжон Обидов бошчилигидаги судлов ҳайъати “кўча” номини олган тўда ишини кўриб чиқишни бошлаганди.
Эслатиб ўтамиз, 2023 йил 2 декабрь куни Тошкент шаҳрида “Саидазиз медгородок” лақаби билан танилган шахс қўлга олингани маълум бўлди. У атрофига жисмонан бақувват шахсларни тўплаб, қарздорлик ва бошқа муаммоларни қонунни четлаб ўтган ҳолда ҳал қилиб бериш билан шуғулланган. 3 декабрь куни эса ҳуқуқ-тартибот идоралари ходимлари “Бахти Ташкентский” лақаби билан танилган Бахтиёр Қудратуллаевни қўлга олди.
Кўп ўтмай Тошкент шаҳрида профилактик тадбир давомида Салимбой номи билан танилган Салим Абдувалиев ҳам ушланди. 1950 йилда туғилган Абдувалиев Салим Киргизбаевич (248-модда 1-қисми, ўқотар қуролни қонунга хилоф равишда сақлаш) гумон қилинувчи тарзида жалб этилган. Март охирларида унга 6 йил муддатга озодликдан маҳрум қилиш жазоси тайинлангани маълум бўлди.
Изоҳ (0)