Ижтимоий тармоқларда Салимбой номи билан танилган Салим Абдувалиев ва “Саидазиз медгородок” — Саидазиз Саидалиев ҳамда бошқаларнинг қўйиб юборилгани айтилган хабарлар тарқалди. “Дарё” сўровига жавобан Тошкент шаҳар ИИББ ахборот хизмати ушбу хабарлар ҳақиқатга тўғри келмаслигини маълум қилди.
Таъкидланишича, ижтимоий тармоқларда тарқатилган хабарларда айтилган шахслар қўйиб юборилмаган. Ҳозирда тергов ишлари давом эттирилмоқда, уларга қўлланган қамоқ эҳтиёт чораси ўзгартирилмаган.
Декабрь ойининг бошларида Тошкент шаҳар ИИББ пойтахтда ҳуқуқ-тартибот идоралари томонидан “кўча боллари” ва жиноий гуруҳларни аниқлаш ва қўлга олиш бўйича кенг кўламли рейдлар ўтказилаётгани ҳақида хабар берганди.
2 декабрь куни Тошкент шаҳрида “Саидазиз медгородок” лақаби билан танилган шахс қўлга олингани маълум бўлди. У атрофига жисмонан бақувват шахсларни тўплаб, қарздорлик ва бошқа муаммоларни қонунни четлаб ўтган ҳолда ҳал қилиб бериш билан шуғулланган. 3 декабрь куни эса ҳуқуқ-тартибот идоралари ходимлари “Бахти Ташкентский” лақаби билан танилган Бахтиёр Қудратуллаевни қўлга олди.
Кўп ўтмай Тошкент шаҳрида профилактик тадбир давомида Салимбой номи билан танилган Салим Абдувалиев ҳам ушланди. 1950 йилда туғилган Абдувалиев Салим Киргизбаевич (248-модда 1-қисми, ўқотар қуролни қонунга хилоф равишда сақлаш) гумон қилинувчи тарзида жалб этилган.
Изоҳ (0)