Ижтимоий тармоқларда Юлдуз Усмонованинг Наманганда ўтказилган концерт дастурига киришда тартибсизликлар бўлгани ҳақидаги видеолар тарқалди. “Дарё” сўровига кўра, Наманган вилояти ҳокимининг маданият масалалари бўйича маслаҳатчиси Акбарали Асқаров вазият бўйича қуйидагиларни маълум қилди.
— Шу йилнинг 28 май куни “Афсоналар водийси” тематик паркининг амфитеатрида “Зўрнаво” масъулияти чекланган жамияти вакиллари Ўзбекистон халқ артисти Юлдуз Усмонованинг концертини ташкил этган. Концерт ва оммавий томошаларни ташкил этишда ҳокимият назорати эмас, бу ҳақида фақатгина Ички ишлар органлари хабардор қилинади, холос. Шу боис, биз концерт ўтказилиши ҳақида огоҳлантирилмаганмиз. Тадбиркор амфитеатр масъуллари билан келишган ҳолда, концертни ташкил этиб, чипталарни аҳолига сотган. Амфитеатр 2 300 кишига мўлжалланган ва тахминимизча, чипталар белгиланганидан анча кўп сотилган. Шу боисдан тартиб бузарлик юзага келган. Ҳолат бўйича ҳеч ким жароҳат олмаган, аммо кўплаб инсонлар қўлларидаги чипта билан ташқарида қолиб, сарсон бўлишган, дейди Наманган вилояти ҳокимининг маданият масалалари бўйича маслаҳатчиси Акбарали Асқаров.
Мазкур вазият бўйича ИИВ Жамоат хавфсизлиги департаменти ахборот хизмати раҳбари Музифа Султонова қуйидагиларни маълум қилди.
— Тадбир ташкилотчилари томонидан таклифнома асосида кирадиган фуқаролар учун амфитеатрнинг олди томонидан қўшимча 500 та ўриндиқлар ўрнатилган. Концертга чипта билан ташриф буюрган аксарият фуқаролар ўзлари билан 2-3 та фарзандларини олиб келган ва улар бошқа фуқароларнинг ўриндиқларига ўтириб олгани оқибатида тартибсизлик юзага келган. Тартибни сақлаш учун ҳудудий 100 га яқин ички ишлар ходимлари, Миллий гвардия ва Фавқулодда вазиятлар бошқармасининг шахсий таркиби хизматга жалб этилган. Шу боисдан, концерт дастурини ўтказиш вақтида ҳеч қандай фавқулодда ҳолат юзага келгани йўқ, дейди Музифа Султонова.
Маълум қилинишича, ҳозирда терговга қадар суриштирув ишлари олиб борилмоқда.
Изоҳ (0)