2025 йилнинг 22 май куни супермодел Наоми Кемпбелл 55 ёшини нишонлади. Шу муносабат билан дунёнинг энг машҳҳур ва талабгир модели ҳақида қизиқарли маълумотларни тўпладик.
Подиумдаги йиқилиш карьера юксалишига айланди
Тўқсонинчи йиллар бошида Наоми Кемпбелл аллақачон тажрибали модел бўлиб, кўплаб подиумларда қатнашганди. Шу боис 1993 йилнинг куз-қиш мавсумида Vivienne Wеstwооd намойишига чиқиш учун баланд платформа ва 23 сантиметр пошнали туфли кийишга тўғри келганда, у ҳечам иккиланмайди. Бироқ чиқиш пайтида мувозанатини сақлай олмайди: модел қоқилиб, подиум ўртасида йиқилади, пушти патли шарфини силкитиб, кулиб юборади. Профессионал модел карьерасида фалокатга айланиши мумкин бўлган бу воқеа Наомига фойда келтиради: томошабинлар унинг самимий муносабатини ижобий қабул қилишади, шоу ва йиқилиш лаҳзаси эса тарихга киради.
Моделлар дунёси рақобатга тўла, у ерда дўстликка ўрин йўқ, деган фикр тарқалган. Аммо Наоми Кемпбелл бундан мустасно
Тўқсонинчи йилларда Наоми каби супермодел мақомига эришган Кристи Терлингтон ва Линда Евангелиста Кемпбеллнинг яқин дугоналари бўлиб, уни қийин вазиятларда қўллаб-қувватлаган. Масалан, 1990 йилда Наоми Dolce & Gabbana кўргазмаси танловидан ўта олмаган. Шунда аллақачон тасдиқланган моделлар рўйхатига киритилган Кристи ва Линда намойишда қатнашишдан воз кечишган. Кастинг директори муросага келишга мажбур бўлган ва натижада учала модел ҳам кўргазмага олинган.
Наоми Кемпбелл ҳеч қачон босиқ бўлмаган: у кескин, жиззаки бўлгани учун кўп бора муаммоларга дуч келган.
2007 йилда суд уни ғазаб отида хизматкорига телефонини отгани учун беш кунлик жамоат ишларига маҳкум этган. Супермодел жазони норозилик акциясига айлантириш ва ўз қадр-қимматини сақлаб қолишга эришади: Нью Йорк канализациясини тозалаши керак бўлса-да, ҳар куни ишга башанг кийиниб, сочларини мукаммал турмаклаган ва пардоз қилган ҳолда келарди. Ишнинг сўнгги кунида эса у бир неча минг доллар турувчи Dolce & Gabbanaʼнинг кумушранг кўйлагини кийиб олади.
2011 йилда Кемпбелл Британия ГҚ журнали учун журналист ролини ўйнаб, интервью олади
У оддий одамдан эмас, балки Владимир Путиндан интервью олган. Бош вазир (ўша пайтда Путин шу лавозимда эди) билан спорт машғулотлари, браконьерликка муносабат ва ҳатто бир гуруҳ талаба қизлар сиёсатчининг туғилган кунига атаб тайёрлаган тақвим ҳақида суҳбатлашади.
Наоми Кемпбеллнинг мода саноатида хилма-хилликни тарғиб қилишдаги ҳиссаси
Наоми бўлмаганда, мода олами қора танли моделларни қийинчиликлар билан қабул қилиши мумкин эди. Унинг ютуқлари орасида 2008 йил июль ойида чоп этилган Италия Vogue журналининг Black Issue сонини муҳим босқич деб ҳисоблаш мумкин. Бу сон мода ва маданиятдаги қора танли аёлларга бағишланганди. Муқовасида Наоми тасвирланган журнал 72 соат ичида сотилиб, нашриёт қўшимча нусхалар чоп этишга мажбур бўлади: журналнинг яна 30 минг нусхаси Америкада ва худди шунча нусхаси Европада нашр этилади.
Наоми Африка модаси ва африкалик дизайнерларни оммалаштириш бўйича фаол ишларини давом эттирмоқда
2018 йилда у Cоndé Nast International нашриётига мурожаат қилиб, қитъанинг мода саноати ютуқларини жаҳон миқёсида ёритиш учун Vogue журналининг Африка нашрини чиқаришни таклиф этди. Кемпбелл доимо Лагосдаги Arise мода ҳафталигини модел ва эксперт сифатида қўллаб-қувватлаб келган. 2020 йил куз-қиш мавсумининг Париж мода ҳафталигида эса супермодел иштирок этган ягона намойиш ёш нигериялик бренд Kenneth Izeʼнинг шоуси бўлди.
Изоҳ (0)