Тошкент шаҳрида 1975-2024 йиллар май ойида кузатилган максимал ва минимал ҳаво ҳарорати бўйича маълумот берилди.
Мазкур давр мобайнида май ойидаги максимал ҳароратлар одатда 33–39 даража оралиғида бўлган. Энг юқори максимал ҳаво ҳарорати 1986 йилда 38,7 даража ва 2004 йилда 38,6 даражада қайд этилган.
Айниқса, охирги ўн йилликда (2014–2024) май ойидаги максимал ҳарорат кўрсаткичларининг изчил ошиб бораётгани кузатилмоқда. Бу ҳолат иқлим ўзгаришлари жараёнлари таъсирида ҳароратларнинг юқорилаш тенденцияси кучайиб бораётганидан далолат беради.
Минимал ҳарорат кўрсаткичларига тўхталадиган бўлсак, 1975–2003 йиллар оралиғида бу кўрсаткичлар 0–8 даража атрофида бўлган. 2004–2024 йиллар давомида эса минимал ҳарорат даражалари сезиларли тарзда ошиб, 5–12 даража оралиғида кузатилмоқда. Айни пайтгача май ойидаги энг паст ҳарорат 1989 йилда қайд этилган бўлиб, ушбу йилда минимал ҳарорат 1,7 даражагача пасайган.
Таҳлил натижалари Тошкент шаҳрида май ойи давомида ҳарорат режимида иқлимий ўзгаришлар фонида сезиларли ўсиш кузатилаётганини кўрсатмоқда. Бу ҳолат иқлим барқарорлиги ва экологик хавфсизликни таъминлаш борасида тизимли чоралар кўришни талаб этади.
Мутахассисларнинг таъкидлашича, бундай динамик ҳарорат ўзгаришлари ҳудуддаги агротехник ишлар, сув ресурслари мувозанати ва аҳолининг саломатлигига ҳам бевосита таъсир кўрсатиши мумкин. Шу муносабат билан, атроф-муҳит мониторинги, иқлимий прогнозлар аниқлигини ошириш ва ҳароратнинг кескин ўзгаришларига тайёрлик чораларини кучайтириш зарурати ортиб бормоқда.
Изоҳ (0)