24 ёшида бева қолган инстаблогер, стилист Камола Орипованинг бугунги кунда тўртта фарзанди бор. Бахтли аёл бу кунларга осонликча эришмаган. Камола Орипова ва Ҳасан Мақсудовлар ўз ҳаёт йўллари ҳақида “Иккаламиз” кўрсатувида гапириб берди.
“Мен Ҳасан акани эмас, улар мени танлаганлар”
— Даставвал ижтимоий тармоқ орқали, бир-биримизни ҳаётда кўрмасдан туриб танишганмиз. Аммо уларнинг муомалалари, гапираётган гаплари билан қилаётган амаллари бир-бирига тўғри келаётгани менга ёққан.
Биринчи марта ёзганларида панданинг расмини жўнатиб, пандага ўхшаркансиз, деган. Менинг энг оғриқли нуқтам вазн бўлгани учун бу бир оз ҳақоратли туйилган, аммо улар учун эркалаш эди. Шу тариқа муносабатлар бошланиб кетган. У бошида уйдагиларига қандай тушунтиришни ўйлаб чўчиган. Чунки бўйдоқ, ҳали турмуш қурмаган инсон эди. Биласиз, бизнинг ўзбек менталитетида бунга чуқур эътибор беришади, дейди Камола Орипова.
— Барибир ижтимоий тармоқдан инсоннинг характерини аниқ билиш имконсиз. Аммо Камола билан кўришгандан, гаплашгандан кейин ҳам менинг у ҳақидаги тасаввурларим ҳам, фикрларим ҳам ўзгармаган. Фақат муносабатлар бошланаётган пайти уйдагиларимга қандай тушунтираман деб бир оз қўрққанман. Лекин мен аллақачон ният қилиб, ўзим учун ҳал қилиб бўлган эдим. Барчаси яхши кўрганлигим ва ҳурмат қилганлигим сабабли эди, дейди блогернинг турмуш ўртоғи Ҳасан Мақсудов.
“Афруз” гуруҳидагилар нотўғри ўйлашди”
— Ҳасан ака асли Наманганнинг Поп туманидан, аммо биз ижтимоий тармоқда танишганимизда Москвада эди. Мен билан учрашгани Тошкентга келганида ўзим аэропортдан кутиб олганман. Барибир ҳаётда кўришиб, гаплашиб олишимиз керак эди. Улар келганларидан сўнг Сўқоққа борганмиз. Автомобильни мен бошқарганман. Сўқоққа етиб боргунча менга умуман гапирмаганлар. Мен эса ҳаётда ёқмадим, нега гапирмайдилар, энди нима бўлади деб ўйлашни бошлаганман. Аммо улар 4 соат самолётда чарчаган эканлар. Сўқоқда овқатланиб бўлганимиздан сўнг “тапчан”да бир оз мизғиб олганлар. Кейин кетамиз деб турганимизда не кўз билан кўрайки, Зафар ва Жамшид — “Афруз” гуруҳи ёнимиздаги “тапчан”да экан.Нима қилишни билмай, ассалому алайкум деганман. Энди бир-биримизни таниймиз, шоу-бизнес одамларимиз, улар нима деб ўйлайди, турмуш ўртоғи бўлмаган инсон билан тоғма-тоғ юрибди деб нотўғри ўйлашади деб қўрққанман. Кейин Ҳасан акам, ҳеч нарса бўлмайди, мен ўзимни биламан, оиламни ҳам биламан, сен ҳаммасини менга қўйиб бер деганлар ва мен ҳаммасини уларга қўйиб берганман, дейди Камола Орипова.
“Ё уни танлайсан, ё бизни”
— Оиламни кўндиришга икки йил вақт кетган. Москвадалигимда улар менга уйланиш учун қиз топиб бўлишган эди. Аммо мен ўртоқларимникидаман, тоғдаман деб Намангандан Тошкентга келиб-кетиб юрганман. Уйдагиларим буни билиб қолиб, Тошкентга ҳам жўнатмай қўйишган эди. Бир оз чекиниш ҳам бўлган, аммо Камолани ташлаб кетгим келмаган. Чунки унинг оиласи ва атрофидаги яқинлари билан танишиб бўлган эдим.
Онам “Ё уни танлайсан, ё мени”, деганидан кейин ўйлаб олиш учун қайтиб яна Москвага кетганман. У ерда тўрт ой яшаб, яна Тошкентга қайтганман. Шу орада никоҳ ўқитиб, қонуний оила қуриб бирга яшашни бошлаганмиз. Яна қайтиб Россияга кетдим ва биринчи фарзандимиз туғилишида келиб, бир ой яшаб яна Москвага қайтганман. Кўп бориб-келишимнинг сабаби ота-онам мени Москвада деб билишар эди. Тошкентга келиб-кетиб юрганимни, оила қурганимни кейин билишган. Ўшанда ҳаммасини уйдагиларимга тушунтирганман.
Биринчи фарзандим бир ёшдан ўтганидан сўнг онамнинг ўзлари келганлар, дейди Ҳасан Мақсудов.
“Ҳомиладорлигимда турмуш ўртоғимни уйлантирмоқчи бўлишган”
— Қайнонам билан кўришганимда ва улар мени қабул қилганларида чуқур ҳаловат ҳис қилганман. Чунки ҳомиладорлигимда улар қиз топиб, турмуш ўртоғимни уйлантиришмоқчи бўлишган. Аммо ҳозир ҳаммаси яхши. Қайнонамни жудаям яхши кўраман. Иккала қуда кўришганида бизни уларга керагимиз ҳам бўлмай қолади, дейди Камола Орипова ҳазил билан кулиб.
“Бўйдоқ инсонга турмушга чиқаман деб ният қилганман”
— Аллоҳнинг изни билан турмушим ўхшамади. Бева қолдим, энди нима қиламан деб ўйлаганман. Турмуш қурмайман деб катта гапирмаганман, аммо қурсам ҳам оиласи йўқ, бўйдоқ инсонга турмушга чиқаман деганман. Чунки қонуний ажрашган бўлса ҳам ҳар кимнинг ортида ўтмиши, собиқ рафиқаси, оиласи, фарзандлари бўлади. Бу нарсадан қўрққанман. Бировнинг ҳаётига киришни хоҳламаганман. Шунинг учун бу масалада энди гапиришни хоҳламайман ҳам, дейди блогер.
“Қайта ҳаёт берилганда ҳам шу ҳаётни танлаган бўлар эдим”
— Нолимайман, ҳаётим яхши. Ота бўлганимдан сўнг турмуш ўртоғимни янаям ҳурмат қилишни бошладим. Кейинги ҳаётимда ҳам шу ҳаётимни танлаган бўлардим. Шу оиламни, шу аёлимни, у билан фарзандларимизни бирга катта қилишни...
Билолхўжа ҳам мени яхши қабул қилган. У билан эркакча гаплашиб турамиз. Ҳозир 18 га киряпти, улғайяпти. Шу сабабли бир оз муносабатларимиз қийинроқ тус олаётгандек туйиляпти, аммо аёлим бу борада бизга ёрдам беряпти, дейди Ҳасан Мақсудов.
“Менинг премерам — қизларим”
— Мен ҳеч қачон қиз фарзандим бўлади деб ўйламаганман, хаёлимга ҳам келмаган, тасаввур ҳам қилмаганман. Билолхўжани ҳам яхши кўраман, у ҳам фарзандим. Кўпчилик “Ўғлингиз қаерда яшайди?”, — деб савол беради. Фарзанд қаерда яшаши мумкин? Билолхўжа ижтимоий тармоқларда кўринишни истамайди. Бу дегани у мен билан яшамайди дегани эмас.
Кўпчилик ўзимдаги вазият ўғлимда ҳам бўлиб қолса, ўғлимга олиб бераманми, йўқми шуни кўп сўрашади. Аввало тақдир. Агар мен турмуш ўртоғимни яхши кўрганчалик яхши кўрса, қалбан яқин бўлса, ҳурмат қилса, меҳрини бера олса, мен йўқ демайман, дейди инстаблогер фарзандлари ҳақида.
Изоҳ (0)