Марҳум ўзбек санъаткорларининг фарзандлари қайси соҳаларда фаолият юритади? (фото)

Инсон неча ёш бўлмасин, ота-онадан айрилиш оғир мусибат. Бироқ ҳаёт давом этади. Тақдир тақозоси билан ота-онасидан эрта айрилган машҳурларнинг фарзандлари бугунги кунда нималар билан банд? Қуйида шу ҳақда сўз боради.

Алишер Ҳамроев

«Ёдгор» фильми орқали минглаб томошабинлар меҳрини қозонган актёр Алишер Ҳамроевнинг икки нафар фарзанди бор. Айни кунларда Мадина инглиз филологияси бўйича таҳсил оляпти. У университетда 3-курс бўлиш билан бирга ўқув марказида ҳам ишлайди. Актёрнинг ўғли Искандар эса университетга киришга тайёргарлик кўрмоқда. Отаси ва онасидан эрта айрилган Мадина ва Искандар холасининг қарамоғида тарбияланмоқда.

Зокир Ўрмонов

«Чархпалак» сериалидаги роли билан яхши таниш бўлган актёр Зокир Ўрмонов саратон хасталиги сабаб вафот этган. Ундан Муҳаммаджон ва Самир исмли ўғиллар қолди. Самир 22 ёшда — у Москва давлат технологиялар ва бошқарув университетида таҳсил оляпти. 19 ёшни қаршилаган Муҳаммаджон эса университетга киришга тайёргарлик кўрмоқда.

Шаҳнозабону

42 ёшида оламдан ўтган хонанда Шаҳнозабонунинг ёлғизгина қизи бор. Умидахон Йўлдошева онасининг тавсиясига кўра сартарошлик касбини эгаллаган. Умидахон оилали, унинг 4 ёшли Амирбек исмли ўғли бор.

Фатҳулла Масъудов

Ўзбекистонда хизмат кўрсатган артист, марҳум ижодкор Фатҳулла Масъудовдан ҳам уч фарзанд қолган. Тўнғич фарзанди Гулноза фарзандлар тарбияси билан банд. Ўғли Улуғбек (Ҳабибуллоҳ) эса бир неча йилдан буён кичик тадбиркорлик билан шуғулланади. Кенжатойи Абдуллоҳ эса Ўзбекистон давлат драма театрида актёр сифатида фаолият юритади. Айрим сабабларга кўра, у отаси раҳбарлик қилган Ўзбек Миллий академик драма театрида фаолият юритолмади.

Мўмин Орипов 

«Божалар» гуруҳининг аъзоси Мўмин Орипов 25 ёшида ҳаётдан кўз юмган. Унинг ўлимига Сурхондарёдаги автоҳалокат сабаб бўлган. Ижодкор вафот этганида ўғли Билолхўжа бир яшар болакай эди. У айни дамда мактабни тамомлаш арафасида. Онаси Камола Орипова турмушга чиққан. Унинг иккинчи турмушидан Марямхон ва Нурания исмли қизлари бор.

Шуҳрат Нуралиев

Комик актёр Шуҳрат Нуралиев хасталик сабаб 37 ёшида вафот этган. Унинг Мафтуна, Умаржон ва Сарвинисо исмли фарзандлари бор. 19 ёшни қаршилаган Мафтуна етказиб бериш хизмати соҳасида фаолият юритади.

Ўғли Умаржон эса 17 ёшда, спортга қизиқади. Айни кунларда у спорт соҳаси бўйича институтда ўқишга тайёргарлик кўрмоқда. Қизи Сарвинисо эса 16 ёшда ва мактабда таҳсил олмоқда.

Мирза Азизов

Ўзбекистон халқ артисти Мирза Азизов 2021 йили коронавирус сабаб вафот этган. Унинг бир ўғил ва бир қиз фарзанди бор. Ўғли Азизхон тадбиркор. Қизи Маҳзунахон эса уй бекаси.

Раҳматилла Мирзаев

Марҳум сухандон Раҳматилла Мирзаев ва хонанда Аъло Раҳимованинг никоҳидан ёлғиз қиз фарзанди бор. Шодиябегим Мирзаева 19 ёшда ва у Туркиядаги Нишанташи университетининг Саҳна санъати факультетида таҳсил олади.

Абдурайим Абдуваҳобов

Ўзбекистонда хизмат кўрсатган артист Абдурайим Абдуваҳобов рафиқаси Гулнора опа билан уч фарзандни вояга етказди. Катта ўғли Абдуқаҳҳор «Ўзбекфильм»да фаолият юритади. Кичик ўғли Абдужаббор эса «Ободонлаштириш бош бошқармаси»да муҳандис бўлиб ишлайди. Қизи Дилдорахон эса фарзандлар тарбияси билан банд.

Азиза Ниёзметова

Саратон хасталиги сабаб 46 ёшида вафот этган хонанда Азиза Ниёзметова ўз интервьюларида 6 фарзанднинг онаси эканлигини ва уларнинг тўрттасини ўзи дунёга келтирганини айтарди. Хонанданинг тўнғич фарзандлари Нилуфар ва Миразиз Назарийлар анча улғайиб қолган ва ҳали вояга етмаган сингилларига ғамхўрлик қилади. Улар онасининг ўлимидан кейин тадбиркорлик ишларини давом эттиришга астойдил бел боғлади.

Нилуфар Назарийнинг ёлғиз ўғли бор. Миразиз Назарий эса 2021 йил оила қурди. Хонанданинг учинчи фарзанди Диёра мактабни тамомлади. Икки ёшида онасидан етим қолган Мадина эса олти ёшга тўлди ва мактабга чиқишга тайёргарлик кўрмоқда.