Ўзбекистонда 2024 йил 3 октябрь куни “Креатив иқтисодиёт тўғрисида”ги қонун қабул қилинди.
Унга кўра, креатив иқтисодиётни қўллаб-қувватлаш, ривожлантириш ва ушбу соҳадаги муносабатларни тартибга солиш қонуннинг мақсади ҳисобланади.
Креатив индустрия соҳаларидаги фаолият йўналишлари қуйидагиларни ўз ичига олади:
- адабий ижодни;
- амалий санъат ва ҳунармандчиликни;
- архитектура, лойиҳалаштириш ва урбанистикани;
- аудиовизуал санъатни;
- ижрочилик санъатини;
- концерт-томоша фаолиятини ва оммавий-маданий тадбирларни ташкил этишни;
- рақамли технологиялар соҳасидаги ижодий фаолиятни.
Креатив индустрия соҳаларида фуқароларнинг ўз ижодий ва интеллектуал салоҳиятини намоён этиши учун зарур шарт-шароитлар яратиш креатив иқтисодиёт соҳасидаги давлат сиёсатининг асосий йўналишларидан бири ҳисобланади.
Вазирлар Маҳкамаси креатив иқтисодиёт соҳасида ягона давлат сиёсатини амалга оширилишини таъминлайди.
Креатив иқтисодиётни ривожлантириш бўйича республика кенгаши креатив индустрия соҳаларини ривожлантириш бўйича жамоатчилик асосида фаолият олиб борадиган маслаҳат органидир.
Қонун расмий эълон қилинган кундан эътиборан кучга кирди.
2 октябрь куни Тошкентда IV Бутунжаҳон Креатив иқтисодиёт анжумани бўлиб ўтди. Маданият ва санъатни ривожлантириш жамғармаси томонидан ташкил этилган тадбирда 75 давлатдан санъат, маданият, архитектура, мода ва бошқа ижодий соҳа вакиллари иштирок этди. Анжуманда креатив иқтисодиёт келажаги, янги технологиялар, хусусан, сунъий интеллектнинг мазкур соҳага таъсири муҳокама қилинди.
Таъкидланишича, дунёда маданий ва ижодий саноат йилига тахминан 2,3 триллион доллар даромад келтиради. Бу глобал ялпи ички маҳсулотнинг қарийб 3,1 фоизига тенг. 2030 йилга бориб мазкур кўрсаткич 10 фоизга ўсиши кутилмоқда.
Ижодий иқтисодиётнинг дунё иқтисодиётидаги улуши жадал ўсишда давом этяпти. Ўзбекистон учун ҳам ижодий иқтисодиёт жуда муҳим ҳисобланади. “Менимча” кўрсатувининг сентябрь ойидаги сонида бунинг сабабларига тўхталиб ўтилганди.
Изоҳ (0)