O‘zbekistonda 2024-yil 3-oktyabr kuni “Kreativ iqtisodiyot to‘g‘risida”gi qonun qabul qilindi.
Unga ko‘ra, kreativ iqtisodiyotni qo‘llab-quvvatlash, rivojlantirish va ushbu sohadagi munosabatlarni tartibga solish qonunning maqsadi hisoblanadi.
Kreativ industriya sohalaridagi faoliyat yo‘nalishlari quyidagilarni o‘z ichiga oladi:
- adabiy ijodni;
- amaliy san’at va hunarmandchilikni;
- arxitektura, loyihalashtirish va urbanistikani;
- audiovizual san’atni;
- ijrochilik san’atini;
- konsert-tomosha faoliyatini va ommaviy-madaniy tadbirlarni tashkil etishni;
- raqamli texnologiyalar sohasidagi ijodiy faoliyatni.
Kreativ industriya sohalarida fuqarolarning o‘z ijodiy va intellektual salohiyatini namoyon etishi uchun zarur shart-sharoitlar yaratish kreativ iqtisodiyot sohasidagi davlat siyosatining asosiy yo‘nalishlaridan biri hisoblanadi.
Vazirlar Mahkamasi kreativ iqtisodiyot sohasida yagona davlat siyosatini amalga oshirilishini ta’minlaydi.
Kreativ iqtisodiyotni rivojlantirish bo‘yicha respublika kengashi kreativ industriya sohalarini rivojlantirish bo‘yicha jamoatchilik asosida faoliyat olib boradigan maslahat organidir.
Qonun rasmiy e’lon qilingan kundan e’tiboran kuchga kirdi.
2-oktyabr kuni Toshkentda IV Butunjahon Kreativ iqtisodiyot anjumani bo‘lib o‘tdi. Madaniyat va sanʼatni rivojlantirish jamg‘armasi tomonidan tashkil etilgan tadbirda 75 davlatdan sanʼat, madaniyat, arxitektura, moda va boshqa ijodiy soha vakillari ishtirok etdi. Anjumanda kreativ iqtisodiyot kelajagi, yangi texnologiyalar, xususan, sunʼiy intellektning mazkur sohaga taʼsiri muhokama qilindi.
Taʼkidlanishicha, dunyoda madaniy va ijodiy sanoat yiliga taxminan 2,3 trillion dollar daromad keltiradi. Bu global yalpi ichki mahsulotning qariyb 3,1 foiziga teng. 2030-yilga borib mazkur ko‘rsatkich 10 foizga o‘sishi kutilmoqda.
Ijodiy iqtisodiyotning dunyo iqtisodiyotidagi ulushi jadal o‘sishda davom etyapti. O‘zbekiston uchun ham ijodiy iqtisodiyot juda muhim hisoblanadi. “Menimcha” ko‘rsatuvining sentyabr oyidagi sonida buning sabablariga to‘xtalib o‘tilgandi.
Izoh (0)