UzAutoMotors 8 май куни соат 10:00 да 4 500 дона Lacetti автомобилига шартнома очилишини эълон қилганди. Компания матбуот хизматига кўра, 15 дақиқа ичида 4,4 мингта машинага шартнома тузилган.
UzAutoMotors 8 май куни сотувга чиқадиган барча автомобилларни шу заҳоти олиб кетиш имконияти билан шартнома тузиш мумкинлигини, шунингдек, Damas ва Labo автомобиллари учун ҳам шартнома тузилишини маълум қилган эди.
8 май 10:15 ҳолатига кўра эса 4 400 дона Chevrolet Lacetti автомобили учун шартнома тузилгани маълум бўлди. Орадан яна бир неча дақиқа ўтиб, Chevrolet Lacetti автомобиллари учун тузилган шартномалар сони 4 500 тага етди.
Тузилган шартномаларнинг 99,9 фоизи Оnе ID тизимида рўйхатдан ўтган ва 1 та дан кўп бўлмаган автомобиль учун шартнома тузган жисмоний шахсларга тўғри келади, — дейилади компания хабарида.
Эслатиб ўтамиз, UzAutoMotors 2023 йил 4 август куни ишлаб чиқариш линияларида амалга оширилган модернизация ишлари, шунингдек, завод фаолияти самарадорлигининг ошиши ҳисобига қўшимча 50 000 дона автомобиль ишлаб чиқариш имконияти яратилганини маълум қилган эди. Эртасига, 5 августда эса шартнома бериш тўхтатилгани маълум қилинганди.
Шунингдек, 18-сентябрь куни UzAutoMotors расмий сайтида кўрсатилган комплектация ва ранглардаги Chevrolet Cobalt, Lacetti, Damas ва Labo автомобиллари учун контрактация очилди ва кўп ўтмай Cobalt ва Lacetti учун шартнома бериш тўхтатилди. Декабрь ойида эса UzAutoMotors Chevrolet Lacetti (Gentra) ишлаб чиқаришни тўхтатиши маълум бўлган эди. Ўшанда мазкур автомобиль учун бутловчи қисмлар ишлаб чиқарувчи корхоналарнинг ишлаб чиқариш қувватлари янги моделларга йўналтирилиши айтилганди.
Изоҳ (0)