Рақобатни ривожлантириш ва истеъмолчилар ҳуқуқларини ҳимоя қилиш қўмитаси Uzum Tezkor’нинг устун мавқейини тан олди. Бу ҳақда қўмита матбуот хизмати хабар берди.
Қўмитанинг тегишли буйруғи билан тайёр овқат ва бошқа истеъмол маҳсулотларини буюртма бериш ва етказиб бериш агрегатори хизмати бозорида Uzum Tezkor устун мавқега эга рақамли платформа оператори деб эътироф этилди. Бунга асос сифатида Uzum Tezkor бозорда устун мавқега эришгани тўғрисида Рақобат қўмитасига хабарнома тақдим этган.
Қўмита рақамли платформа оператори устун мавқейини суиистеъмол қилиш ҳолатларининг олдини олиш мақсадида мажбурий тартибда Монополияга қарши комплаенс тизими жорий этилиши ва тегишли тартибда мониторинг ўтказиб борилишини ҳам билдириб ўтди.
Рақобат қўмитаси 19 март куни Uzum Market ҳам устун мавқега эга деб топилганини эълон қилганди.
Вазирлар Маҳкамасининг 2024 йил 1 майдаги қарори 2-иловаси билан тасдиқланган Рақамли платформа операторининг устун мавқейини ва устун музокара кучини эътироф этиш тартиби тўғрисидаги низомда рақамли платформа операторининг устун мавқега эга деб эътироф этишнинг мезонлари белгиланган.
Товар ёки молия бозоридаги хўжалик юритувчи субъектнинг ёхуд шахслар гуруҳининг унга ўз фаолиятини рақобатлашувчи хўжалик юритувчи субъектларга боғлиқ бўлмаган ҳолда амалга ошириш ва рақобатнинг ҳолатига ҳал қилувчи таъсир кўрсатиш, тегишли бозорга бошқа хўжалик юритувчи субъектларнинг киришини қийинлаштириш ёхуд ушбу бошқа субъектларнинг иқтисодий фаолият эркинлигини бошқача тарзда чеклаш имкониятини берадиган ҳолати устун мавқедир.
Изоҳ (0)