Raqobatni rivojlantirish va iste’molchilar huquqlarini himoya qilish qo‘mitasi Uzum Tezkor’ning ustun mavqeyini tan oldi. Bu haqda qo‘mita matbuot xizmati xabar berdi.
Qo‘mitaning tegishli buyrug‘i bilan tayyor ovqat va boshqa iste’mol mahsulotlarini buyurtma berish va yetkazib berish agregatori xizmati bozorida Uzum Tezkor ustun mavqega ega raqamli platforma operatori deb e’tirof etildi. Bunga asos sifatida Uzum Tezkor bozorda ustun mavqega erishgani to‘g‘risida Raqobat qo‘mitasiga xabarnoma taqdim etgan.
Qo‘mita raqamli platforma operatori ustun mavqeyini suiiste’mol qilish holatlarining oldini olish maqsadida majburiy tartibda Monopoliyaga qarshi komplayens tizimi joriy etilishi va tegishli tartibda monitoring o‘tkazib borilishini ham bildirib o‘tdi.
Raqobat qo‘mitasi 19-mart kuni Uzum Market ham ustun mavqega ega deb topilganini e’lon qilgandi.
Vazirlar Mahkamasining 2024-yil 1-maydagi qarori 2-ilovasi bilan tasdiqlangan Raqamli platforma operatorining ustun mavqeyini va ustun muzokara kuchini e’tirof etish tartibi to‘g‘risidagi nizomda raqamli platforma operatorining ustun mavqega ega deb e’tirof etishning mezonlari belgilangan.
Tovar yoki moliya bozoridagi xo‘jalik yurituvchi subyektning yoxud shaxslar guruhining unga o‘z faoliyatini raqobatlashuvchi xo‘jalik yurituvchi subyektlarga bog‘liq bo‘lmagan holda amalga oshirish va raqobatning holatiga hal qiluvchi ta’sir ko‘rsatish, tegishli bozorga boshqa xo‘jalik yurituvchi sub’yektlarning kirishini qiyinlashtirish yoxud ushbu boshqa subyektlarning iqtisodiy faoliyat erkinligini boshqacha tarzda cheklash imkoniyatini beradigan holati ustun mavqedir.
Izoh (0)