Исроил разведка хизмати “Моссад” раҳбари Девид Барнеа ҲАМАС билан ўт очишни тўхтатиш ва асирлар алмашинуви бўйича эҳтимолий келишувнинг биринчи босқичидан сўнг Ғазога ҳужумларни давом эттириш тарафдори эканини айтди.
Haaretz нашрига кўра, Барнеа вазирлар маҳкамаси йиғилишида иштирок этиб, йиғилганларга маҳбусларни алмашиш бўйича музокараларнинг бориши ҳақида маълум қилган.
Моссад директори бош вазир Бенямин Нетаньяху сингари ўт очишни тўхтатиш ва маҳбусларни алмашиш бўйича келишувнинг биринчи босқичи амалга оширилгандан сўнг, Исроил армиясининг Ғазога ҳужумлар бошлашини маъқуллаган. Барнеа сўнгги кунларда Ғазога ҳужумларнинг кучайиши маҳбусларни алмашиш бўйича музокараларга “ижобий таъсир” кўрсатишига ишонч билдирган.
Исроил ва ҲАМАС билвосита музокараларда муҳокама қилаётган маҳбусларни алмашиш бўйича келишув таклифи уч босқични ўз ичига олади:
- Биринчи босқич зудлик билан ўт очишни тўхтатиш, аёллар, кексалар ва ярадор маҳбусларни озод қилиш, фаластинлик асирларни алмашиш, Исроил қўшинларини Ғазонинг аҳоли пунктларидан олиб чиқиб кетиш, инсонпарварлик ёрдами оқимини кўпайтириш, асосий хизматларни қайта тиклаш, фаластинлик тинч аҳолининг Ғазо сектори бўйлаб ўз уйларига қайтишини таъминлашни ўз ичига олади.
- Иккинчи босқич инқирознинг барқарор ечимига эришиш учун қолган барча маҳбусларни озод қилиш ва Исроил қўшинларини Ғазодан бутунлай олиб чиқиб кетишни назарда тутади.
- Учинчи босқичда бир неча йилга чўзиладиган Ғазони реконструкция қилиш режасини бошлаш ва ҳалок бўлган маҳбусларнинг жасадларини топшириш илгари сурилмоқда.
Изоҳ (0)